Ta pa algun tempo caba cu tin un investigacion andando den seno di Nagico Group, relaciona cu posibel “conflicto di interes” den maneho y operacion di e agencia di seguro. Den e proceso, durante e ultimo lunanan, henter e ekipo di gerencia na Nagico Insurances Aruba a kita for di trabou of nan a kita nan. Pero, den e proceso a suspende drs. Detlef Hooyboer, Chief Executive Officer (CEO) di Nagico Group, riba instruccion di Banco Central, debi na un investigacion andando.
E investigacion andando, manera a sali den e sentencia di un di e managernan, ta indica cu e compania, cu algun tempo pasa a cambia di doño y a apunta Hooyboer na cabes, a descubri cu na Aruba ta traha hopi estrecho cu un broker, esta Aruba Insurance Broker. Tin por lo menos 5 cliente di Nagico cu a indica cu internamente a cambia nan seguro for di e agencia di seguro pa e broker, sin cu nan a duna instruccion pa haci tal. Relaciona cu esaki a kita e persona responsabel “op staande voet” y hues a bay di acuerdo cu e decision!
Pero….ta parce cu e investigacion no ta contra e empleada specifico aki, sino henter e liña cu ta core den e compania. Den e mundo di investigacion ta papia di “follow the money” y lo yega na e Ultimate Beneficial Owner (UBO). Mientras cu a kita e empleada, gerencia di e compania awor ta purba yega na un “link” entre e decisionnan aki y e CEO.
Den e caso di labor, Nagico a bisa hues cu e practica aki a causa cu e agencia di seguro a perde di gana centenares di miles di florin. Companianan grandi cu seguro y primanan halto a pasa pa e broker encuestion y tur esaki a sosode bou liderazgo di e gerencia. Durante e caso e CEO a bisa hues cu e no tabata sa cu e empleada tabata haci esaki, aunke e trahado ta bisa diferente.
Nagico Group a dicidi mesora pa suspende Hooyboer y a nombra e conocido bankero Ryan Kock den e funcion di Director di Nagico Aruba y ta responde na Banco Central. Parce cu e investigacion aki ta tumando luga den otro mercadonan tambe, pa mira si e copia e mesun practica aki na otro islanan tambe unda Nagico ta opera.
Cu e investigacion aki, por spera casonan den corte y debatenan legal pa yega na e berdad. Un cos ta sigur, ta mustra cu a crea un berdadero “shap den mi shap” na Nagico Insurances Aruba.
Tocante Nagico Aruba
Aki na Aruba e compania a cuminsa na 2004 y a crece rapidamente, specialmente despues cu na aña 2007 nan tabata e prome y unico compania di seguro cu nan mesun servicio di Road Service. Nagico Insurances tin dos oficina na Aruba, un na Savaneta otro den Caya Milio Croes na Dakota.
Tocante Nagico Group
A funda Nagico Insurances na aña 1982 na Sint Maarten y a crece y penetra den mas cu 20 mercado. Nan ta un di e companianan di seguro mas grandi den Caribe Hulandes cu mas di US$ 150 miyon na prima y ta ofrece un di e miho seguro di catastrofe den region. Internacionalmente AM Best a “rate” Nagico como un compania solido. Nagico Insurances a sigui crece door di adkiri British American Insurance Company y awor ta ofrece seguro di bida y medico via e compania Nagico Life.
