Minister Grapperhaus ayera tabata mira futbol riba su tablet durante un debate importante na Den Haag, na Hulanda. Awe Minister Presidente Mark Rutte a defende, bisando cu no ta cos di perde tempo ni pa nos hunga mas santo cu Papa di Roma. Asina mes e mandatario a disculpa su mes pa a mira un pida wega di futbol ayera online.
Durante pregunta di prensa, despues di Conseho di Minister di Reino, a probecha puntra opinion di e prome mandatario Hulandes. A haci referencia na ex Parlamentario cu a retira di su funcion di Parlamentario despues cu a gar’e ta mira Netflix den Parlamento na Hulanda. Sinembargo, Mark Rutte a defende su colega tur cu tin y a pidi prensa Hulandes pa no haci mucho “druk” cu e asunto ey.
El a argumenta cu su colega mester a sinta oranan largo den e reunion, djis pa scucha, pasobra e mes no mester a papia. Tur hende ta saca nan celular un rato pa mira emails of whatsapp, pues ta poco dimas pa critica e Minister cu enbes di lesa email, a mira score di futbol. El a corda tur hende cu no ta henter un pelicula el a mira eyden tampoco.
Ferdinand Bernhard Joseph Grapperhaus di partido CDA ta naci na Amsterdam dia 8 november 1959 y a studia ley. E ta un abogado y desde 26 di october 2017 ta ocupando e puesto di Minister di Husticia y Siguridad di Hulanda den Gabinete Rutte III.
