Dentro di e tempo premira di 2 siman, Stichting Deugdelijk Bestuur Aruba (SDBA) a logra haya e 1000 firmanan pa e carta di gradicimento pa e sosten di Hulanda pa Aruba. P’esey SDBA kier gradici masha tur esnan cu a participa na e accion aki!
No ta trata solamente e sosten humanitario pa duna un gran cantidad di hende di come, pero tambe e prestamonan sin interes pa asisti salubridad publico cu ta bou di hopi presion, duna gobierno di Aruba e posibilidad pa sigui paga su personal, incluso politico, laga departamento di gobierno sigui funciona, apoya FASE, y subsidia empresa pa evita desempleo riba escala grandi. Ademas, e sosten den forma di donacion pa fortifica enseñansa, economia y cuido ta duna speransa pa un ‘Aruba autonomo mas resistente’. Pa SDBA, specialmente e ayudo cu a ofrece pa ‘haci finansa publico mas sostenibel y pa concretisa reforma necesario riba tereno di gobernacion’ ta un parti importante di e pakete total. Pasobra ambos ta forma factor esencial pa realisa bon gobernacion, cual ta e meta principal di SDBA.
CONTRA OF PRO ARUBA?
Tawata remarcabel cu e accion aki a causa basta discusion pro y contra den comunidad. A sugeri entre otro cu e iniciado (pues ami/SDBA) lo ta ‘contra Aruba’. Pa esnan cu sa lesa mi publicacionnan, e contesta mester ta cla: di ningun manera mi ta contra Aruba, pero si contra e manera cu nos (partido) politiconan a goberna y perhudica Aruba durante decada. Esakinan aparentemente ta sugeri cu critica contra nan ta mescos cu critica contra Aruba. Nada ta mas leu di berdad! Pasobra NINGUN HENDE (!) por nenga cu durante mas di 30 aña tawatin structuralmente mal gobernacion, aunke parti di pueblo lo atribui esaki, sin ningun base, solamente na ‘e partido opositor’. Combatimento door di mi/SDBA di mal gobernacion hustamente ta enfoca na transforma e decadencia cu Aruba a experencia bou di tipo di politico asina, den un desaroyo positivo. Por logra esey, si nos enfoca nos mes di berdad riba e terenonan esencial pa Aruba: enseñansa, economia, cuido, naturalesa, etc. Tur ta tereno cu ‘politica’ structuralmente a descuida e ultimo decadanan y cu por haya solamente e debido atencion si tin bon gobernacion. Como tal, ami/SDBA ta completamente dedica na (desaroyo positivo di) Aruba!
AYUDO CONDISHONAL OF ‘SOLUSHON AUTONOMO’?
Tambe tawatin reaccion den sentido cu nos no mester asumi un posicion asina dependiente di Hulanda, pero pa soluciona nos problemanan ‘cu nos propio forsa’. Remarcabelmente e ponencia ey sa bin di hende cu (ainda) tin un entrada sigur y cu no a sinti den persona e hamber y falta general di tur cos locual un grupo creciente di Arubiano sí ta confronta. Probablemente nan no por imagina nan mes tampoco kico lo nifica si no ricibi ayudo di ningun manera y cu nan lo keda na merced di partido politico cu ta busca sosten cerca pais cu no solamente ta hopi corupto, pero tambe ta trapa e derechonan fundamental di hende y/of ta comete teror di estado. Naturalmente ta hopi bon, specialmente den e tempo aki, pa dispone di cierto idealismo, pero ta lamentabel si den esey ta perde realidad for di bista y/of e practica politico perhudicial di decada. Sinembargo, ta duna speransa cu mas y mas ciudadano ta somete nan mes cada bes menos na e actitud arbitrario di (partido) politico y ta asumi un actitud mas critico.
SPERANSA
Mi deseo mas grandi (di SDBA) ta pa Aruba, mescos cu Corsou, cera un acuerdo rapido cu Hulanda pa asina duna comunidad e confiansa bek pa futuro. Esey mester ta posibel como cu nos ministro presidente a declara recientemente cu ya caba un luna pasa tawatin un acuerdo similar. E ‘mal entendimento’ cu a surgi despues di e declaracion di gobierno di Aruba cu “ainda tin suficiente placa pa dos luna” y e reaccion di Hulanda riba esey di larga e prestamo di tres pa cinco luna (pasobra pakico lo bo fia placa na un pais cu kier fia pa un cierto periodo si esaki mes ta bisa cu e tin suficiente fondo pa cubri esey???) no por ta un problema insuperabel. Mi speransa/expectativa (di SDBA) ta cu e ora ey di berdad lo concretisa den un periodo rasonabel (6-7 aña) tur e promesanan pa reforma-no-cumpli cu gobierno consecutivo a yega di haci durante decada pa cu bon gobernacion, integridad y transparencia. Esey so caba ta rekeri lo maximo di un gobierno serio!
