Sindicato di Trahadornan di Aruba (STA) a reuni cu formado di gobierno mr. Evelyn Wever-Croes y esaki a bay bon. E sindicato ta contento cu e audiencia nan a haya, pasobra nan por a expresa e cambionan cu ta desea di mira den gobernacion nobo.
Aruba a sufri golpi duro di pandemia y ta saliendo di dje. Diego de Cuba, presidente di sindicato STA, a indica cu e economia ta creciendo bek y ta acelera, di cual por mira door di e turistanan cu ta yega aeropuerto. Durante e audiencia, STA a entrega diesshete punto cu nan kier a mira cambio den nan. Ta cambio di caracter di urgencia cu mester implementa p’e clase trahado. Segun de Cuba, formado di gobierno y posibel partner di gobernacion tabata tin comprension pa loke STA a trece padilanti. A bin diferente pregunta.
E sindicalista ta kere cu su puntonan treci dilanti tabata di suma importancia pa bin cu cambio den nan lo mas pronto posibel. Den e lista cuater of cinco di nan mester bin cu cambio p’e clase obreril por tin un bida mas humano, el a indica. Algun punto poni riba papel ta e 40 ora semanal den tur sector, asina pa tur hende traha 40 ora pa siman y tin dos dia liber pa siman. E sistema cu tin awo ta cu tin 40 ora y tin 48 ora, 44 ora, ta traha seis dia pa siman. STA ta puntra ki bida social e hendenan aki tin, ki bida familiar nan tin. Hasta esunnan cu ta traha 48 ora pa siman ta traha overtime y no ta mira nan famia mes. Si bin cambio den tur sector y mantene e salario cu e hendenan tin.
Pa cobertura mas amplio, lesa e edicion di TREMPAN mañan.
