Ora cu ta temporada di cuaresma yega, pisca fresco ta bira manera oro. Tur hende tin e tradicion y/of creencia cu tur diaranson y diabierna ta dia di come pisca durante e temporada di cuaresma. Esaki consecuentemente ta conduci, cu e demanda local pa pisca ta subi drasticamente. Esaki sin duda ta pone un presion halto ariba piscadonan cu na momento cu e demanda ta halto, nan ta opta pa bay mas biaha lama.
Sinembargo ta lubida riba e trayecto cu e piscado ta pasa aden y mas ainda e trabou duro den solo y e peliger cu e ta core na momento di subi lama of te hasta piscando nan baranca cu e biento duro.
Pa e motibo aki Santa Rosa kier sigura cu tur e piscadonan ta tene cuenta cu e parti di siguridad riba lama y puntonan pa tene cuenta cu ne. E consehonan aki no solamente ta yuda prome cu subi lama, pero tambe durante cu e piscado ta ariba lama piscando. Den caso algo por bay robes riba lama, e famia y autoridad lo por tin un miho bista cua ta e rumbo cu e piscadonan a coy y tur informacion relevante pa autoridad of pa esnan cu ta bay duna asistencia y ehecuta cualkier buskeda.
E meta di e consehonan aki ta pa promove siguridad pa tur piscado di Aruba, tanto den boto como esnan piscando for di baranca. Corda cu e siguridad ta responsabilidad di tur piscado tanto den boto, na baranca y tambe pa esnan cu ta pisca cu harpoen. Controla prome cu sali pa bay pisca, pa semper bo ta bon prepara.
Si tur sigui e recomendacionann, percura pa e “check list” keda yena y conta cu tur articulo necesario abordo di nan boto, e piscadonan lo no mester preocupa si encaso algo bay robes y nan famia tambe lo ta mas trankil na momento cu nan sernan keri sali bay pisca.
Kico ta e diferente ekiponan di siguridad cu Santa Rosa ta recomenda pa tin abordo di boto:
Life vest of por lo menos un salbabida abordo, specialmente pa esnan cu no por landa.
Suficiente cabuya di anker
Por lo menos 2 galon di awa fresco abordo
Radio (Corda cu un celular no ta funciona leu for di costa)
Spiel pa duna señal
Compas
GPS
Fluit
First-Aid Kit
Sunblock y un sombre/pechi
Aparato pa paga candela
Flashlight
Productonan di consumo cu no ta daña lihe manera crackers, producto den bleki cu por habri facil, juice den bleki of paki etc.
Un shirt manga largo cu por proteha den dia contra solo y den anochi si bira friu.
Scenario pa caso di emergencia cu piscado Proceso # 1 (responsabilidad di piscado)
Na momento di traha plan pa bay pisca, e prome paso ta cu mester tuma ta, avisa famia directo of bisiña. Den caso cu e piscado ta biba su so, mester avisa un familiar, bisiña of amistad. E informacion cual nan mester duna ta por ehempel; e luga di pisca of e area general na unda nan a bay pisca. E orario cu bo ta sali bay pisca y ora cu bo tin planea di ta bek na pier. Si tin radio abordo, tuma contacto via radio y duna bo GPS of sitio na Havenkantoor di APA.
Proceso # 2 Famia ta raporta piscado perdi na Kustwacht na number di telefoon: 913
Mester yama Kustwacht na number 913 di inmediato, pa meld cu e piscadonan no a drenta na e ora stipula y asina bati alarma pa cuminsa cu buskeda. Pa medio di famia autoridad ta haya sa unda e area di piscadonan ta. Autoridad lo mantene contacto cu famia pa duna informacion di e resultado di buskeda. Aki e “checklist” ta hunga un rol importante. Mas extenso esaki wordo yena, miho e lo contribui na e buskeda.
Kico tur mester wordo agrega na e checklist:
E prome informacion importante:
duna e dato di e sitio di pesca. Si bo no tin GPS, menciona e sitio of area general di pesca.
Nomber di e boto
Number di registracion di Directie Scheepvaart
Size di e boto
Color di e boto, for di bista horizontal
Color e boto tin? For di bista di ariba
Cuanto motor e boto tin
Cual ta e marca di motor y su color
Ki ora nan a sali bay pisca
For di cual pier of unda e boto ta mara
Cua canal di radio ta uza
Menciona e nomber di e piscadonan abordo di e boto:
Si cambia di luga, raporta via radio na APA.
Den caso di Pesca na Baranca:
Informa famia den cua area bo lo ta piscando.
Indica e orario cu bo lo bolbe bek cas.
Considera bisti un life vest si bo no por landa, specialmente den area caminda e lama ta bruto of cu tin biento duro.
Por hiba tambe un salba bida cu cabuya cu por wordo tira den awa den caso di cualkier incidente.
Si ta anochi, ta consehabel pa uza un flashlight di cabes cu ta waterproof pa bo tin bo mannan liber.
Proceduranan di siguridad prome cu subi lama:
Check tempo, biento of otro caracteristicanan di lama. Tambe lo por check cu otro piscado of Meteo su website. www.meteo.aw
Yena e parti di e checklist cu informacion di e boto.
Yena e informacion riba e checklist cu localidadnan di pesca y tambe luganan alternativa y specialmente laga informacion di con lo contact otro y orarionan di sali y bolbe.
Tuma bo checklist y revisa e parti di ekiponan di siguridad cu ta recomenda y yena esnan cu ta bay cu ne. Corda cu siguridad riba lama ta bo responsabilidad y percura pa bo tin mas tur cu ta posibel cu bo. Tambe yena e checklist honestamente.
Percura pa por lo menos un persona competente y di confiansa tin e informacion of sa unda pa haya e checklist den caso di emergencia.
Esnan den boto, den caso di emergencia:
Semper percura pa un hende na tera sa unda bo tin planea pa bay pisca. Tin diferente tecnologia pa registra esaki, pero ta importante pa mantene e area nan cu a wordo menciona ariba e riba e checklist. Si dicidi pa cambia di area di pisca cu tin marca ariba e checklist prome cu sali, ta importante pa yama y notifica esun cu ta pending di e piscadonan cu lo bay pisca.
Na momento cu tin cualkier calamidad, e prome paso cu bo tin cu tuma, ta notifica famia of amistad via radio of celular, bo posicion y kico ta e problema. Tin diferente nivel di emergencia. Dependiendo di e tempo cu bo tin, purba duna mas hopi informacion posibel na momento cu bo haci e melding.
Alarma for di tera:
Tuma contacto cu Kustwacht, cual ta e instancia central pa bati alarma den caso di piscadonan cu no a drenta na e ora stipula y cu no a meld via radio of celular cu nan lo drenta otro orario. Mester yama 913. Por bati alarma na cualkier autoridad pero Kustwacht ta esun central.
Kustwacht lo tuma contacto cu e otro instancianan concerni y lo inicia e proceso segun nan plan di procedura den casonan di calamidad.
Piscadonan di Aruba tin un tarea di suma importancia pa Sector Primario y pa Santa Rosa, nan bienestar y siguridad ta bin na prome luga. Sta Rosa ta spera cu piscadonan lo considera e consehonan duna p’asina nan por sigui eherce e ofishi cu tanto nan ta disfruta y cu comunidad por sigui disfruta di pisca fresco.
“Ban pisca, pero semper cu siguridad den mente!
