Aña 2020, ta parce ta e aña cu fundacionnan lo ta e blanco di atake. Por lo menos dos situacion a wordo tira den laira, pa wak cua di e fundacionnan atrobe ta gara e bala den su man.
Ta un lastima e situacion aki, ya cu ta trata netamente di trahadonan cu salario abao, vulnerabel, pero laborando un trabao inmenso.
1. Werksternan: Un lucha grandi di añanan largo, sin discriminacion contra esnan cu ta traha na SKOA of otro fundacionnan¡!
Na aña 1990 Gobierno a cambia e status di tur arbeider y werkster pa ambtenaar y tambe a keda dicidi cu lo mester traha un rangenstelsel nobo.
SEPPA mester a lucha hopi mes, pa logra kibra loke a keda categorisa tambe como un “discriminacion”. Esaki pa motibo cu e protocol di 1997 tabata papia idioma cla¡! Simplemente mester a traha riba un Rangenstelstel pa e werksternan.
Ta asina cu na 1997 a regla e rangenstelsel solamente pa e arbeidernan y e grupo di werkster mes a keda afo. Despues nos a enfrenta e decision di Gobierno cu a dicidi cu lo bay pasa e trabaonan aki di limpieza pa sector priva.
Atrobe na 2003 a base di un caso na corte a bolbe enfatiza e urgencia pa por yega na un rangenstelsel. Na 2004, porfin Gobierno ta cambia su decision y ta haci e werksternan ambtenaar cual ta bolbe habri e caminda pa discuti un rangenstelsel.
E acuerdo cu tin riba e asunto di Werksternan, tanto pa esnan den Gobierno como pa e fundacionnan tabata un lucha largo.
E asunto di werksternan ta na varios ocasion nos a trece p’adilanti y ta e asunto cu a conoce un discriminacion masha grandi mes.
Durante añanan, SEPPA a bin ta trece padilanti cu akinan ta trata di un grupo di trahadornan, hende muhernan balente cu a keda perhudica den hopi sentido.
Perhudica pa motibo di desicionnan den pasado, despues pa falta di desicionnan correcto cu mester a wordo ehecuta, despues pa falta di un sistema na unda solamente ta wak e placa y no e derecho di e trahador.
Asina nos a wak con pa hopi aña e hende muhenan aki a traha den: incertidumbre, cu un salario abao cu a keda atrás pa hopi aña, sin un perspectiva di carera (hasta mester corda e decision di Gobierno un tempo pa duna e servicio aki na tercera (sector priva).
Esaki a bolbe tuma su añanan ya cu Gobierno a keda insisti cu no tin placa!.
Na 2013, SEPPA despues di un lucha largo a yega na acuerdo cu Gobierno riba e Rangenstelsel pa e werksternan. Durante discusionnan semper nos a papia di Werksternan den servicio di Gobierno pero tambe esnan di fundacionnan ¡!
Despues di augustus 2013 e implementacion di e cambionan di salario a conoce algun problemanan tambe, hasta ora cu a ripara cu e fundacionnan no tabata haya e subsidio correcto pa por ehecuta e rangenstelsel di 2013 pa e werksternan cu ta traha na e fundacionnan.
E discusionnan aki tambe nos a hiba cu Gobierno y después esaki a keda corrigi di banda di Gobierno ¡
Cu condicionnan Secundario ta wordo subsidia no ta nifica cu e trahador automaticamente ambtenaar, pero esey no ta nifica cu e no por tin mesun derecho riba e condicionnan laboral cu un ambtenaar tin ¡!
Ta asina cu na tur fundacionnan cu ta wordo subsidia y SKOA ta un di nan, Gobierno ta subsidia salarionan, diferente condicionnan secundario igual cu empleado publico. Cu excepcion di p.e. Pensioen.
Esaki ta un situacion di hopi aña. Gobierno tras di Gobierno a ehecuta esaki.
Gobierno semper a hiba e maneho cu e ta subsidia salario a base di un sistema cu e ta controla. Pues, for di momento cu e rangenstelsel pa werksternan a drenta na vigor pa esnan cu ta labora pa pai Aruba, automaticamente Gobierno a pone esaki tambe como e base pa por paga esnan cu ta labora na fundacionnan.
Mescos ta e condicionnan laboral secundario. Awor no por bin bisa, cu ta subsidia e salario basico y otro condicionnan secundario no!!…
Ademas, tur e prima(nan), p.e. bashi premie, gelijkbedrag, reparatiepremie tur ta parti di e salario y/of entrada di e trahado, ya cu tur esakinan en principio lo mester tabata den salario pero a acorda pa pone nan na banda!
Pues, ta incomprendibel pa bisa cu ta sigui subsidia salario, pero ta parce cu e premienan cu tambe ta parti di salario, esey si no.
SEPPA ta spera cu e asunto aki ta wordo atendi corectamente pa Conseho di Minister pa evita desasternan pa grupo grandi di trahado. Fundacionnan si tin e obligacion como dunado di trabao pa cumpli cu su trahadornan pero no ta dispone di placa pa por hasi esaki. Menos ainda crea dos tipo di trahado den su organisacion, pa un ta gosa di mas beneficio cu e otro. Esaki no tin nada di haber cu e status di ambtenaar pero ta un cuestion di principio¡!.
Awor aki nos ta papiando di p.e. na SKOA, pero e por pasa den tur fundacionnan aki na Aruba y por crea mas problema ¡.
2. Aanvullende verzekering of AZV-plus pa trahadonan di Fundacion ta wordo kita!
Apenas algun siman di prome luna di aña 2020, e trahadornan di Fundacionnan a haya e informacion cu e “aanvullende verzekering “ of AZV plus, cu tabata wordo subsidia pa Gobierno ya no lo ta e caso mas.
For di unda of ki momento e decision aki a sali no ta conoci. Loke si te conoci ta cu e fundacionnan diripiente ta haya nan man na cabes, ya cu semper e derecho aki a wordo subsidia pa e trahadornan di fundacionnan. Ademas di esaki, e ta hinca den diferente contrato di trabao ¡!
SEPPA a reuni cu Minister di Asuntonan Social, ya cu mayoria di e fundacionnan aki ta cay bao di su ministerio. Minister Glenbert Croes a informa SEPPA cu su Gobierno en todo caso no a duna ningun ordo pa kita un derecho asina for di e trahado di fundacionnan.
SEPPA ta spera e mesun reaccion di parti di e otro Ministernan bao cual un of otro fundacion ta resorta, pa asina e asunto aki ta wordo aclarea y soluciona manera mester ta.
Tambe SEPPA a bin comprende cu lo bay corrigi e malentendimiento aki pa asina esnan cu tin cu corigi e eror aki haci’e tambe. Nos ta spera cu enberdad esaki lo sosode.
