No semper menos ta malo. Den e caso aki, aunke cu e cifranan no ta cla ainda, tin tur indicacion cu a bin menos turista Aruba pa participa na e Soul Beach Music Festival. Net e aña aki a celebra 20 aniversario cu ta organisa e concierto cu diferente artista y comediante internacional na Aruba. E evento aki, tradicionalmente ta atrae hopi turista y hende local den e weekend di Memorial Day, cu a tuma luga entre 24 pa 29 di mei ultimo.
Por lo menos un cadena di hotel a sigura na nos cu e aña aki, e huespednan cu a bin pa Soul Beach a gasta un poco mas cu aña pasa. No ta hopi mas, pero contal cu e ta mas y no menos. Nan ta bou di e impresion cu e cantidad di turista tabata un poco menos, pero cu e calidad ta mustra di ta superior. Claro cu ainda no tur cifra ta cla, pero te cu awo, por lo menos, asina ta mustrando.
Un compania renombra pa bende productonan di calidad y caro, a sigura cu nan ta super contento cu Soul Beach e aña aki atrobe. Ta bisa atrobe pasobra tur aña nan ta haya hopi turista cu ta bin cumpra cerca nan. Pero cu e aña aki ta parce un record. Nan a bende tas y otro acesorionan manera cos cu “no tin mañan”, asina un trahado a comenta na nos cu un sonrisa riba su cara.
Na aeropuerto un empleado a comenta na nos cu parce cu e aña aki, e pasaheronan cu a bin pa participa na e Soul Beach Music Festival a yega cu masha sed. Nan no a spaar den cumpra alcohol na nan yegada y salida for di nos isla. Parce cu Hennessy tabata e bebida cu mas nan a cumpra. Ta papia di un record den benta, compara cu tur e 20 añanan cu ta organisa e evento aki na Aruba, esta papiando di aspectonan di benta na airport. “E turistanan a yega carga y a bay mas carga ainda”.
Un evento cu sigur a hala atencion tabata entre otro Jill Scott, e banda The Roots y Tifanny Haddish. Parce cu e evento di comedia a hala mas atencion y tabata mas yen cu otronan. Pues publico grandi no tabatin, pero gastamento si a bay bon y miho!
