Awe tardi a tuma luga e manifestacion yama pa diferente grupo contra abuso, entre nan esun di abuso di mucha cu tin como lider, Richie Danies. Locual cu a resalta mesora awe ta cu e agogida no tabata locual a spera ni anticipa. Danies a bisa cu tin hopi “Facebook Warriors” pero nan no ta sali for di nan cas y mustra nan malcontento publicamente.
Un grupo limita di manifestante a presenta y forma parti di e protesta di awe. Den combersacion cu Danies el a duna den su declaracion su desapunto, el a bisa “Mi so tambe por“ pero esey no tabata e idea y cu si e keda den su man el lo por bay mas leu. Pesey ta pidi atencion di pueblo pa tene e protesta mas pasivo cu ta posibel.
Presente na e manifestacion di awe tambe tabatin un miembro di partido politico Curpa cu a yega cu su pancarta y a expresa su disgusto. Su enfoke mas bien tabata varia manera entre otro contagio di Covid-19 y e problemanan pa gobierno combati esaki. “Tin dos grupo, e localnan y esunnan ilegal cu ta busca ayudo medico pero cu no ta registra”.
Mientrastanto pocopoco algun hende mas a yega pa brinda nan sosten y tur cos bou control policial pa tene e manifestacion aki na ordo, aunke no tabatin un cantidad grandi di manifestantenan na sitio. Asina mes, como cu un di e spandoeknan tabatin un mensahe bulgar riba dje, a causa cu polis a presenta atrobe pa bay cu ne. E manifestantenan a medio purba stroba e proceso ey pero den un forma tactico a logra kita e spandoek for di nan mannan y hib’e den aut’i polis pa por bay cu ne.
Richie Danies a expresa disgusta despues di e incidente, bisando cu e sa e wega bon bon di e polisnan, esta pa busca un confrontacion pa nan por detene mesora y hib’e ward’i polis pa e manifestacion por termina. El a alerta e defensornan di ley cu si nan ta bin cu e “weganan” aki, cu e tambe por y por percura pa basta accion awe nochi ainda tur rond di nos isla. El a menciona e rotondenan y Plaza Betico Croes entre otro.
