“SMOA (red: awo SVOA) ta contento pa anuncia cu a nombra un rector nobo pa Colegio Arubano cu ta sr. Tim Croes,” esaki ta loke e Stichting a bisa den un declaracion na prensa. Stichting Middelbaar Onderwijs Aruba a bira Stichting Voortgezet Onderwijs Aruba, cu ta encarga cu Colegio Arubano.
Nan ta menciona cu Sr. Croes no ta un desconoci pa Colegio Arubano. El a cuminsa su carera na Hulanda y den e añanan 2001 pa 2009 el a duna les na “voortgezet onderwijs” y despues na Hogeschool Utrecht.
Na 2010 sr Croes a bin Aruba y a cuminsa duna les como docente wiskunde full time na Colegio Arubano. El a duna les na Havo y Vwo. E tabata tambe voorzitter di e sectie wiskunde y tambe e tabata voorzitter di ALV (representante di e docentenan).
Desde 2013 sr Croes a bay traha fulltime na Universidad di Aruba. Hunto cu un comision el a establece un lerarenopleiding di Wiskunde riba nivel di Bachelor (2de graads) na Universidad di Aruba. Tambe e ta duna les na Universidad. Desde 2016 sr. Croes ta decaan di Faculty of Arts and Science na Universidad. Sr. Croes tambe ta responsabel pa duna les den sistema digital na Universidad.
Durante e periode di 2013 te cu recien, sr Croes a keda duna les part time na Colegio Arubano y Avondhavo y ta miembro di e commissie-examen di Wiskunde A,B en D na Examenbureau.
Banda di su Masters den Wiskunde Sr. Croes tambe tin diploma como Coach in het Onderwijs y tambe a sigui diferente curso relevante pa educacion manera didactico, ITC y examinering. Tambe el a sigui e curso di Educational Leadership for Collaboration cu ta dirigi specialmente riba liderato den educacion Arubano.
SMOA ta di opinion cu sr Croes mirando su experiencia y entusiasmo pa sigui desaroya y pa e tereno digital lo ta e persona pa Colegio Arubano. No ta SMOA so. Tambe e selectiecommissie cu ta existi di 3 trahado di Colegio Arubano (1 miembro di ALV (grupo di docente) , 1 miembro di Ondersteunend personeel y 1 miembro di rectoraad) unanimamente a scoge pa sr. Croes.
SMOA ta contento cu e nombramento di sr Croes y ta sigur cu e lo trece paz bek na Colegio Arubano.
