SMAC ta cla pa Carnaval. Esaki lo bira Carnaval 64. E reunionnan a tuma luga caba cu e miembronan di board. Tur cos ta canando manera nan a planifica. SMAC a sinta cu e lidernan di grupo di Carnaval. A bin algun cambio masha chikito unda a sinta cu Cuerpo Policial.
Shannon Henriquez, presidente di SMAC a splica cu nan ta den full preparacion tanto pa 11/11, tanto pa Carnaval mes. SMAC a wordo funda door di tanto group leader y musiconan. Sintando cu mayoria di e group leadernan, a yega na un acuerdo pa revisa e draft di e schedule y a bin un paar di cambio masha chikito, manera indica. A sigui over y reuni cu Cuerpo Policial, unda cu tin di bisa cu e reunion a bay hopi bon. A bay di acuerod cu practicamente tur cos. Na e momentonan aki tin di bisa cu tur e permisonan a wordo entrega y na e momentonan aki ta planeando, y ta den full preparacion pa loke ta 11/11 mes, unda cu tin di menciona cu SMAC lo tin un biaha mas nan evento na Carnival Village. Esaki lo tuma luga e lo ta riba un diasabra. E anochi aki lo wordo dedica na e presidente anterior, sr. Randy Thiel. Tambe e anochi aki lo wordo compaña pa varios banda local y brassband. Cu un bar y cushina bon surti. E ta completamente gratis. Henter pueblo di Aruba ta wordo invita pa tey y sostene e bandanan local y tambe pa cuminsa sinti e ambiente pa loke ta Carnaval 64.
Tur cos ta in place
Tur cos ta inplace caba, segun Henriquez. Pa cada actividad cu wordo organisa y pa cada parada, mester pidi e permiso adelanta. Na e momentonan aki tin di bisa cu esey a tuma luga caba. E reunionnan mester sigui, manera cu a haci’e den añanan anterior, hunto cu Polis y stakeholdernan. Tur cos ta canando manera cu tin planea. Ta cla pa traha na bienestad di Aruba su carnaval.
Activo
Henriquez a splica cu pa loke ta e aña aki, tur e otro añanan anterior, no tin duda cu tur reunion lo continua cada siman. Ta prepara, hunto cu Cuerpo Policial y e stakeholdernan pa tur actividad cu ta bin e fin di siman su dilanti y despues di actividad ta sinta hunto pa evalua. E ta gewoon un rutina pa loke ta nan reunionnan y tambe e board ta sinta tur dia ora aña habri. Tur ta sinta hunto y cera cabes pa percura pa tur actividad ta un exito, manera cu nos conoce den pasado. E carnaval ta cortico e aña cu ta bin y tur weekend lo tin actividad. E prome actividad ta e parada di flambeu dia 6 di Januari, lo cuminsa na Entertainment Center y caba na ex DOW. Tur parada na Playa lo cuminsa na Aruba Entertainment Center.
Saliendo for di un solo luga
Mester ta open pa otro opcionnan y awor a dicidi di bin cu e cambio aki. E cambionan aki ta mas facil, en particular pa henter e pueblo di Aruba, cu constantemente diferente ruta. Miho mantene un solo ruta, saliendo for di un solo luga. E lider di grupo y pueblo ta contento cu esaki. Pa loke ta Carnaval 64, tur parada di Playa, ta cuminsa na e luga ya menciona. Esaki tabata e miho decision. Semper bo mester ta open pa purba otro opcionnan y a haci esey tambe. Na e momentonan aki esaki ta un cambio. Tin di bisa cu tur, tanto e groupleadernan y tambe e participantenan y pueblo di Aruba ta keda sumamente contento.
Parada di Mucha
E carnaval di mucha lo keda cu e mesun ruta. E aña aki, pa loke ta parada di mucha, a cuminsa na Entertainment Center, sigui den LG Smith Boulevard, bira bay den Adriaan Lacle Boulevard, bira den Wilhelminastraat y caba na Aruba Entertainment Center. E ruta aki lo keda mesun cos. E ruta di mucha lo no caba na ex DOW. Tin cu corda semper cu ta un parada pa e muchanan. Ta pensa semper cu ta hopi solo y esaki tabata un ruta cu definitivamente e aña aki a resulta hopi bon y e muchanan a disfruta. Como organisacion y hunto cu e groupleadernan ta wak e bienestar di e participantenan, cu ta e mucha chikitonan.
