Coronavirus sigur a afecta tur hende. Tambe esnan cu ta core e busnan chikito. 24ora.com a combersa cu chauffer di bus Wilson, kende a expresa cu nan ta haya e golpi aki duro. Nan no tin nada pa bisa pasobra e ta un problema mundial.
“Ta warda riba Dios pa wak ki milager e por haci pa nos. E chauffeurnan no tin otro manera pa biba,” segun Wilson. Awor aki e chauffeurnan ta cuminsa pa 6’or di mainta, pa atardi tin biaha nan ta sali bay playa cu un pasahero. Si nan haya suerte, nan ta haya 3, 4 of 5 pasahero y ta gradici e Ser Supremo.
Pero awe por ehempel, Wilson a sali bay Playa cu tres hende. Por ta e por yega tambe sin ningun pasahero of por yega cu 2 tambe.
Antes tin biaha por dal’e 5 bay Playa y 5 bin bek San Nicolas. E chauffeurnan mes ta bay cas pasobra ora cu nan yega na stacion, na no ta haya nada. Loke nan haya ta net pa pone den auto.
Antes nan tabata core anochi, pero awo ya pa 8’or di anochi mester drenta cas.
E storianan cu nan ta tende
E chauffeurnan di bus ta scucha hopi storia. Segun Wilson, pasaheronan ta papia manera desespera pasobra ningun hende no sa pa cuanto tempo e ciere ta, si ta pa un, pa dos luna. No por bisa cu esaki ta un castigo cu ta bin di ningun hende. Si ta bin di Dios, nos mester acepta.
Gastonan
E gastonan normal ta sigui, pero e miedo cu nan tin mas dilanti ta cu kico nan ta bay biba. Un solo problema tin cu te ainda ningun hende di gobierno no a bin yama tur chauffeur di bus. Nan sa cu na ta biba di e trabao aki. Ningun hende no a bin papia cu nan. Con gobierno ta bay yuda nan. Nan tin nan famia, nan tin debe, nan tin tur cos. Con nan ta bay biba, segun Wilson. Awor aki, tin como cinco pa seis hende cu ta coriendo actualmente.
Ta di spera cu e situacion por drecha pa asina e chauffeurnan di bus chikito por sigui haya nan entrada.
