Posesion di arma di candela riba un rumbo peligroso, ta locual cu polis a indica. E aña aki so ta registra un total di 18 incidente relaciona cu arma di candela, conoci pa polis. En bista di esaki Ministerio Publico y Cuerpo Policial di Aruba a manda un comunicado informando riba intensificacion cu lo bay tuma luga riba arma di candela.
Polis lo intensiva e procedimento relaciona cu posesion di arma di candela ilegal den e proximo tempo aki y na varios sitio na nos isla. Esaki relaciona cu e aumento di e cantidad di incidente cu arma di candela na Aruba.
For di cifranan di polis ta resulta cu posesion di arma di candela illegal bou nos hobennan en particular, ta creciendo mas y mas. Banda di esey tin varios incidente cu nunca a meld y di cual polis a haya sa via-via.
En total a tuma 17 arma di candela y 6 arma di aire den beslag.
Violencia di arma di candela tin un impacto grandi riba e ciudadano. E por haci cu ta cuminsa reina un sentimento di insiguridad den comunidad. Siguridad ta ademas di importancia crucial pa nos turismo. Aruba ta conoci como un destinacion unda turista por sali riba caya trankil y sigur, na unda cu nan ta y na cualkier ora cu ta.
Ministerio Publico di Aruba y polis ta pone valor na proteha y conserva e sentimento di siguridad aki, tanto pa e ciudadano como pa e bishitante.
