Recientemente e CdC di Aruba, di Corsou y di Sint Maarten a reuni hunto na Corsou y e reunion tabata uno hopi fructifero. E Camaranan ta desea di traha hunto pa logra crecemento di e economia di nan pais. E organisacion nan a delibera riba diferente tema, manera reforma fiscal, landspakket, debe cu Hulanda, digitalisacion, UBO register y e habrimento di e frontera cu Venezuela.
CdC di Aruba y Corsou ta desea pa e frontera cu Venezuela habri y a reuni caba cu CdC di Venezuela y Fedecamaras encuanto e topico aki. Habrimento di e frontera cu Venezuela ta den beneficio di tur dos isla ya cu esey lo trece cu ne cu por importa productonan na prijs mas economico, mirando cu e gastonan di transporte (fleta) lo ta hopi menos. E organisacionnan lo sigui pone enfasis pa habri e frontera cu Venezuela.
Tambe tabatin hopi interes di Corsou y Sint Maarten pa e sistema di digitalisacion cu Aruba ta uza pa su registronan. Aruba ta e unico cu ta uza un plataforma digital. Aruba lo intercambia informacion cu nan di e proceso y beneficionan di digitalisacion.
Si ta di remarca cu actualmente Aruba ta e unico isla cu tin e obligacion pa ley pa establece un registro di UBO (Ultimate Beneficiary Owner). E obligacion aki lo trece hopi trabao pa CdC Aruba, pero tambe mas obligacion y trabao pa cada compania cu mester registra y actualisa nan dato den e UBO register.
Referente na e reforma fiscal, cada isla tin diferente leynan fiscal. No tin mucho informacion di e cambionan cu lo wordo treci y tampoco a ricibi un concepto di ley di e reforma fiscal.
E Camaranan ta hopi contento di por a reuni hunto pa trata diferente topico di atencion comun y a palabra cu lo sinta hunto atrobe pa delinea nan conseho, informacion y accion cu ta concerni e diferente topiconan.
