Un solo trahado di Departamento di Salud Publico (DVG) a gana e Mini Mega di diabierna ultimo, den pleno celebracion di Sinterklaas. E ganado, cu pa casualidad ta traha hopi aña caba na DVG hunto cu su casa, den e seccion Dienst Warenkeuring en Hygiene, a gana e premio gordo dio 700 mil florin. El a cumpra e numbernan ganado cerca di su cas mes, na Moko-Catiri.
Riba diamars ultimo e premio di Mini Mega tabata 430 mil florin y cu 2 florin mas por a gana 100 mil florin extra di Mega Plus. No tabatin ganado. Consecuentemente, Lotto, e loteria di Aruba, a dicidi pa “drecha” e premio di diabierna, net despues di fin di luna y a pone 150 mil florin extra riba dje den Mega Plus, mientras cu e premio mes a subi cu 20 mil florin pa 450 mil florin. Pues si hunga 5 florin lo por gana te cu 450 mil florin y solamente si hunga Mega Plus, cu ta costa 7 florin total, por gana e 250 mil florin adicional pa yega na e bunita premio di 700 mil florin cera!
Diabierna anochi, sorteo # 1304 di Lotto di Aruba, a saca e numbernan 06-08-13 y 27. E Mega Ball ta # 1. Tabatin un solo ganado di e prome premio, cu nan a cumpra na Gitano, situa na Catiri-Moko, cerca di cas di e ganado. No ta conoci si ta number vast el a hunga of si ta un “Lotto Loco” el a cumpra, djis pa tin su “liña na awa”.
Lotto, e loteria di Aruba ta existi desde 1982 y tin diferente wega; Catochi, Big 4, 1-OFF, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e weganan di Raspa y Gana. E fundacion a sa di crece benta di e productonan durante e ultimo añanan te alcansa un record na 2017 di 50 miyon florin! Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
