Precisamente ayera riba su fecha natal, Minister Presidente mr. Evelyn Wever-Croes, cu temporalmente ta encarga tambe cu e cartera di Infrastructura y Medio Ambiente, a probecha pa start un proyecto di planta mata di fruta den varios districto tur rond di nos isla. Ayera, a start cu e proyecto den e districto di Savaneta, unda planta un mata di mango.
Cu e proyecto aki, Gabinete Wever-Croes kier mustra e importancia den proteha nos planeta, simbolisando crecemento y desaroyo. Plantamento di mata ta un fenomeno cu ta creciendo internacionalmente. Ta conoci cu dor di planta mata ta mantene nos planeta mas berde y mas saludabel. Mundo henter ta confrontando e reto cu cada bez tin menos mata debi na desaroyo economico, den cual ta elimina mondinan pa por construi edificio.
E hecho cu a scoge mata di mango ta debi na e tantisimo beneficionan cu e mata tin pa salud di hende, separa cu mango semper ta dushi pa come. Separa di come como fruta, ultimo tempo ta uza mango mas y mas pa remedi tambe, specialmente pa cura di diabetes. Blachi di mata di mango ta yuda contraresta otro retonan di salud, manera ta controla diarea, fortalece sistema circulatorio, yuda baha keintura y hasta pa maneha bo presion.
Mango ta un relahante natural cu ta combati insomnio, asma, bronkitis y verkoud. E ta ideal pa bebe como prevencion di e tipo aki di patologia.
