Dia 7 di mei 1999 Lic. Maria Cristina Harsveld, logopedista a establece oficialmente Clinica Integral di Logopedia Aruba. Durante e añanan a mira e necesidad pa ofrece mas servicio den forma integral pa beneficia persona cu algun discapacidad y nan famia, como contesta na e necesidad pa ofrece mas servicio den forma integral, dia 6 di april 2009 tabata estableci oficialmente Fundacion Siñami Paso pa Paso Aruba (F.S.P.P.A.), cu e meta pa duna orientacion y guia integral di diferente disciplina pa beneficia mucha, hoben y adulto cu algun discapacidad y nan famia.
Durante e periodo di 2009 pa 2024 Fundacion Siñami Paso pa Paso Aruba a ofrece servicio di Psicologia, logopedia, terapia educativo, tayer di arte y psico-educacion pa e mayornan. Tambe a ehecuta exitosamente algun proyecto cu a beneficia e grupo di meta y nos comunidad, algun di e proyecto ta: guia profesional, eco-pasco, guia p’e mayornan 1 Ki ora mester bay un psicologo, 2 Un boca sano pa henter bo bida, 3 Kico ta motorica?, 4 Habla y lenguahe di 0 pa 12 luna, 5 Habla y lenguahe di 1 pa 2 aña, proyecto intergeneracional, tienda movibel, stimulacion tempran, proyecto pa mucha cu discapacidad intelectual leve, proyecto pa hoben cu discapacidad intelectual leve, proyecto buki di balor un tesoro pa mi bida, e programanan di boluntario, e ferianan di salud y informacion entre otro.
Tambe a logra cera algun acuerdo y convenio di cooperacion cu algun instancia local y internacional, esaki pa por ofrece un servicio di calidad halto y ta na haltura di e avancenan cu lo beneficia nos grupo di meta y nan famia.
Den actualidad Fundacion Siñami Paso pa Paso ta sinti orguyoso di e sosten y confianza cu ta ricibi door di nos comunidad y door di algun instancia/organisacion local y internacional, tambe di por conta cu un directiva y team boluntario cu ta consisti di profesional den e area di; medicina, psicologia, logopedia, neurociencia organisacional y educacion. Maria Cristina Harsveld, Eva Rusz, Tiara Calvo, Yazxuly Toyo, Angelica Ayala, Rubiela Gracia y Carlos Falla.
Tambe ta un placer pa nos por traha conhuntamente cu algun instancia/scol cu ta pidi nos servicio profesional pa nan cliente / alumno cu tin un retraso den nan desaroyo of un discapacidad intelectual leve y lo mester di un tratamento corto (terapia) of un guia; coaching, mentoring, training, conseho pa un periodo mas largo.
Den futuro cu e sosten di nos comunidad y stakeholders nos lo sigui duna nos servicio profesional specialmente na e grupo vulnerabel di mucha, hoben y adulto cu tin un retraso den nan desaroyo of tin un discapacidad intelectual leve y ta forma parti di e grupo “lage sociaal economische status Lage SES.” Tambe nos a cuminsa traha riba algun acuerdo/proyecto pa amplia nos servicio den forma structural y gradual, esaki teniendo na cuenta e gran demanda cu nos ta ricibi for di e comunidad pa ricibi ayudo integral.
Atencion integral pa un miho futuro
Den conexion cu nos 15 aniversario, den e luna di augustus/september 2024 nos lo bay introduci e buki di balornan “Un tesoro pa mi bida” esaki lo bay parti na algun scolnan y centro di bario, nos kier a duna un danki na e comerciante- y organisacionnan cu ta colabora cu e buki.
Pa finalisa nos kier a duna un danki special na e comunidad di Aruba, nos clientenan, team profesional boluntario, American University School Of Medicine Aruba (AUSOMA), CEDE Aruba, SABA y Samenwerkende Fondsen Cariben pa e sosten ricibi durante e añanan.
