Siman lo habri cu accion, asina por lo menos un docente cu a caba di sali for di e reunion cu SIMAR a bisa pafo di e edificio situa na Sabana Blanco. Directiva di e sindicato cu ta representa docentenan a sigura cu miembronan ta hopi disgusta y e mandato cu nan a duna nan sindicato ta cu “ta basta” y cu mester escala accionnan contra Gobierno. Kico ta e accionnan specificamente ainda no a menciona, como cu ta awo a activa e comision di accion den seno di e sindicato.
Presidente di SIMAR, Josephine Albertus, a bisa na final di e reunion cu Gobierno ta falta nan respet. Ta purba keda nechi, ta manda carta contesta pero nada. Ta sinti cu mester bin mas duro y cu awor ta basta. SIMAR a bisa cu e miembronan mes a ripara awo cu no por sigui tira mas awa den biña. “Nos no ta bisa kico nos lo haci pero lo bin accionnan si. Mi djis por bisa keda pendiente y cu e veld di enseñansa no ta contento con cosnan ta bayendo awo”, el a vocifera.
Pa loke ta e ultimo declaracionnan haci pa e Presidente di ABV pa cu nan logro pa mantene salario intacto y beneficionan intacto pa su miembronan den enfermeria, SIMAR a enfatisa cu asina aki no ta forma di atende e problema na un forma husto ni profesional y pio por papia asina di solidarismo. “Asina no por atende cu sindicato. Tur hende merece respet. Tambe entre sindicatonan tambe mester tin respet y colegialidad y esey no tin cu ABV. Nos ta hay’e jammer pero maestronan ta cla pa sali afo awo”, segun Albertus a finalisa bisando.
Mester menciona cu puntonan cu SIMAR a atende y acorda awe cu su miembronan ta:
1) Otro aña escolar San Nicolas no lo tin scol publico.
2) Commandeur Pieter Boerschool (DPS) tin cu cay bou di SPCOA. No mag di inscribi alumno pa kleuterklas. Dus ta perhudica e scol.
3) Abraham de Veer (DPS) tin cu cay bou di SPCOA. SPCOA mag di haci y deshaci cu e scolnan.
4) Colegio San Nicolas tin cu cay bou di De Schakel. Nan ta bay dicidi.
5) Prins Bernhardschool ta bay cera y bira K12. Schoolgeld ta bay di 385 pa aña pa 3500 pa aña. Mucha ta bay haña les via docente di Merca via computer. Tur les na ingles.
6) SPPF tin cu split den dos mita tin cu bay Seroe Blanco y mi ta tin cu bay SPO Santa Cruz. Alumnonan special.
7) SPO Santa Cruz tin cu bay manda mucha di nan pa Brazil. Dus nan scol lo tin cu fuseer toch. San Nicolas no por carga tur e muchanan.
8) EPB no mag di tuma docente nobo. Dus riba e manera ako ta pusha pa nan toch merge cu EPI. Cierto richting lo no por wordo duna mas. E alumnonan di SPO lo no por sigui pa bay EPB mas.
9) EPI y EPB tin cu merge.
10) Pensionado tin cu traha 100% pero lo wordo paga 30%
Tur esaki sin overleg pero dicidi unilateralmente. Y e manera di e entrega di 5% via basis bezoldiging tot nader orde unda cu lo tin pensioen afbouw. Y e por subi mas ainda. A yega tempo pa para solidario cu bo colega. Awe ta nan mañan por ta abo!
