Sindicato SIMAR a tene un reunion di prensa pa trece dilanti cu docentenan di Colegio San Nicolas no a cobra nan overtime. E docentenan a descubri cu no a paga e orarionan despues di a habri nan payslip.
E veld di enseñansa a haya un carta luna pasa cu e informacion di no paga overtime pero cu lo haci esaki na october. Dia 16 di october un carta ta manda y aki a informa cu no por cumpli cu e acuerdo di 16 di september, pero a bisa e management team pa informa e docentenan. Management team no a informa e docentenan riba esaki.
Josephine Albertus, presidente di SIMAR, a expresa desde aña escolar anterior cu a bin e situacion di COVID-19, e docentenan ta haci todo por todo pa brinda enseñansa na e muchanan. E docentenan ta pidi pa respeta y paga e oranan cu nan ta traha. SIMAR no ta di acuerdo cu esey y a haya diferente informacion.
Nan ta haya straño cu otro directiva di scol si a paga e overtime di nan docente, pero ta puntra dicon DPS si no a paga di nan. SIMAR a bisa cu a yama DPS y minister riba e asunto aki, pero e mandatario a bisa nan cu a bay di acuerdo cu DPS di no tin overtime. Ta duna te diabiena 4:00 di atardi na DPS y minister pa haya sa ki dia ta haci e pago di horarionan cu falta. Segun Albertus, e docentenan di Colegio San Nicolas a informa cu si nan no a haya un contesta pa diabierna atardi, entrante dialuna nan lo cuminsa cu un welga.
