E forma cu Ministerio Publico ta tapando e blunder di baranan di oro ta motibo pa preocupa. Mas ainda cu a sali na cla cu falta bara of baranan di oro. RST a pasa tras di lomba di otro departamentonan local y internacional pa bay purba score y a resulta cu nan confiscacion tabata baranan robes.
Esey ta un muestra cu loke nan tabata buscando probablemente a disparce dilanti nan nanishi. Awe pais Aruba ta para dilanti un posibel demanda miyonario y Ministerio Publico den un silencio. Un caso cu RST cu Ministerio Publico a trek tras di lomba di demas departamentonan local y internacional y awe no por prueba cu e oro ta di contrabando. Loke si a resulta cu e uniconan cu a drenta avion pa detene e pasahero den clase ejecutiva y cu documento di Douane den man, tabata esnan di RST. Un di e miembronan trahando pa RSS Aruba ta e Hulandes Europeo Gijs van der Pol y Martijn Langedoen.
Nan a detene e pasahero den avion y el a keda cuater luna cera sin cu finalmente a presenta un prueba. Kiermen a detene y djey cuminsa busca prueba di acto ilegal y te awe no a haya ningun prueba. E cos aki ta hopi serio unda RST cu Ministerio Publico a horta libertad di un ser humano cuater luna largo. Despues a detene tambe otro persona mas cu ta director y doño di e negoshi di transporta oro. El a keda cera diez dia inhustamente. Di February 2018 a haci detencion y confisca 46 bara di oro. Awe por prueba cu documento den man cu e 46 baranan di oro no tey. Corte of huez comisario tin cuchiu na garganta di Ministerio Publico pa cera e caso of presente despues di un aña y cinco luna cu nan a detene hende y confisca e 46 baranan di oro. Credibilidad di Ministerio Publico ta te na vloer awor aki. Nos tin un Ministerio Publico cu ta prestando su mes pa selectivamente busca hende inocente pa cera causando un daño na imagen di hende. Un Ministerio Publico cu kier tapa pa erornan di RST y cierto cantidad di oro cu no tey mas awe.
Ora cu cana e camindanan oficial pa busca informacion rond di e caso di baranan di oro, ta tende cu no por papia pasobra ainda ta investiga. Den e caso aki no por culpa e vocero pasobra e ta duna prensa loke fiscal bise pa bisa. E realidad ta cu Ministerio Publico kier sconde y awe hasta kier settle cu partidonan cu nan a perhudica pa nan investigacion 100% mal haci. Mas tristo ta cu pais Aruba cu placa di pueblo mester bay cubri e gastonan di e oro cu no tey mas despues di pasa den mannan di RST. Tambe mester bay paga tur e tempo cu e compania a keda perhudica sin por haci negoshi, paga pa e daño pa cera hende inocente, paga pa cada dia cu e oro tabata den man di autoridad inhustamente confisca. Loke tin awe ta un tapamento formal di un maneho selectivo di Ministerio Publico cu ta tapando pa RST den e caso di 46 bara di oro cu awe no ta 46 bara mas. E pregunta ta, ken ta e ladron? E silencio di Ministerio Publico ta prueba awe cu nan ta tapa pa actonan castigable y pa miembronan di RST corupto cu ta cera hende y djey bay busca prueba y te awe no a presenta un prueba. Nos ta djis duna un ehempel con malo RST ta traha.
E oro a yega riba un avion comercial di Aruba Airlines. Den e PV di RST ta pone cu e oro a yega den un avion priva. Un jet priva a trece e oro Aruba. A resulta cu e avion cu nan ta menciona tabata accidenta na Corsow masha tempo caba. Con un RST por usa e tipo di cosnan aki pa cera hende y nada ta pasa? Kiermen nan por atacha negoshi, imagen, perde pertenencia valioso y tur hende mester keda keto. Esaki ta djis un di e motibonan cu hende no ta kere den e husticia di Aruba of kere den Ministerio Publico. Ta spera cu e minister sali papia pasobra e tambe ta sconde of tapa informacion cu lo bay costa pueblo hopi placa.
