Pueblo no por carga mas costo pa procesa sushi: Aumento di tarifa pa procesa sushi no ta un opcion

Ta parce cu e siman aki ainda lo mester tuma luga un destaho publico pa bin cu un “incinerator” Aruba pa kima sushi residencial y comercial. Henter e proyecto aki lo costa riba mey biyon (525.000.000) florin! Finalmente ta pueblo lo mester carga cu e costonan aki pa e compania cu gana e destaho haya su inversion bek y cubri costo di operacion y su ganashi. Gobierno kier un compania priva financia esaki completo y na su luga Serlimar lo paga e suma pa procesa sushi, cu awor aki ta 180 florin pa cada ton.

Awendia EcoGas ta procesa e sushi den envirobales y e compania Caribbean Trucking ta dera e sushi na Ser’i Tijshi. Cu e sistema nobo di kima sushi den un incinerator, expertonan ta calcula cu e suma di 180 florin lo triplifica, aumentado e tarifa cu ta pagando awo na Serlimar pf Ecotech pa recoge y procesa sushi! Gobierno ta bisa cu esaki lo soluciona un problema per no tin tal problema exportando e sushi como combustibel.

Gobierno awor ta den un situacion dificil, pasobra cu e limitacionnan financiero lo bira tur dia menos probabel cu Gobierno por sigui financia y subsidia Serlimar. Riba dje, e presion financiero den cartera di cada famia ta haci’e dificil pa bin cu un aumento di tarifa, si sigui cu e proyecto ambicioso di incinerator. Y riba dje, Minister a anuncia cu comercio y clientenan residencial lo mester paga pa recoge y procesa sushi, pa medio di un ley nobo cu e lo kier pasa despues di reces. E mandatario a subraya cu e ley no ta nifica cu lo cera companianan priva, pero si cu lo defende interesnan di Serlimar. Practicamente lo cobra tur hende, sea cu ta uza Serlimar of no y esaki lo nifica cu Serlimar lo bira un monopolio!

Comercio lo mester paga mas

E pregunta ta, comercio lo ta dispuesto pa aumenta nan gastonan di maneho di desperdicio mas ainda? Hotelnan por ehempel a conoce un aumento inespera cu ta costa algun di nan como 500 mil florin extra pa aña, ora a triplifica e gasto di procesa sushi. Esey ta separa di recogemento di sushi. Gobierno awo lo kier pa nan paga Serlimar y un compania priva separa, loke ta bira mas gasto ainda. Mesun cos kier haci cu clientenan residencial, mientras cu kier cobra turistanan un suma adicional pa cada anochi, tambe pa procesa desperdicio. Pues e hotel ta paga y turista ta paga tambe! AHATA y ATA a bisa caba cu nan no ta na fabor di e aumento aki!

Kico ta miho: Kima sushi na Aruba of export’e pa Colombia?
Pero ta bin un otro reto pa Minister Otmar Oduber. Awor aki 60% di tur sushi na Aruba ta den man di e compania priva EcoTech, cu ta existi desde 1985. Si nan opta pa no hiba nan sushi pa e incinerator sino pa exportacion, ta con e inversionistanan cu nan incinerator por sobrebibi? Pa esey awo Minister Oduber a anuncia cu lo adapta e ley existente obligando tur compania cu mester hiba sushi pa e incinerator, prohibiendo di por ehempel separa, recicla y procesa sushi den envirobales pa exporta pa Colombia pa wordo uza como combustibel den fornonan di procesa cement.

E solucion presenta pa EcoGas ta e miho alternativa awo pa medio ambiente, pa caha di Gobierno y pa cartera di pueblo. Esaki pasobra lo no mester haci inversion y no lo mester adapta tarifanan existente, manera si lo sosode si bay over na incinerator. E solucion uza awendia mes di dera sushi den buraconan grandi rond di nos isla ta mucho mas barata cu e proceso di incinerator.

Kico ta incinerator?

Incineration ta un proceso di tratamento di sushi cu ta envolve kimamento di stofnan organico cu ta den materialnan di desperdicio. Ta discribi incineration y otro sistema di tratamento di sushi cu tin un temperatura halto como “thermal treatment”. E incineration di materialnan di desperdicio ta converti e sushi den sas, rookgas y calor. Mayoria biaha sas ta forma door di inorganic constituents di sushi y por tuma e forma di klompi solido of pidanan cu huma por hiba nan. Mester limpia e rookgas di contaminacion prome cu e bay den e atmosfera. Den algun caso, por uza e calor cu ta genera pa incernation pa genera coriente. Na Aruba sinembargo esey tampoco ta un solucion duradero pasobra e costo pa procesa coriente for di kima sushi ta hopi mas halto cu e procesa regular ma WEB mes. Dicon WEB lo opta pa paga mas pa produci coriente cu e mes por haci di un forma mas eficiente y barata?

Den diferente pais, ainda tin preocupacion di expertonan y comunidad local over e efecto ambiental di forno (incinerators). Algun decada pasa a traha forno cu no a inclui separacion di material pa kita hazardous, bulky of materialnan reciclabel prome cu kima. E facilidadnan aki sa trece salud di empleadonan di planta  y e area ambiental local na riesgo debi na e nivelnan no adecua di limpiesa di gas y control di e proceso di kimamento. Mayoria di e instalacionnan aki no ta genera electricidad.

Solucion di EcoGas a haya bon acogida
For di momento cu ehecutivonan di MetaCorp y EcoGas a logra firma un MoU siman pasa na Cartagena de las Indias, na Colombia, mesora a sinti un acogida grandi den comunidad y organisacionnan NGO. Tur solucion cu ta bon pa medio ambiente y ta economico, ta bon bini na e momento nan aki. Si mester scoge entre exporta nos sushi y keda cu e mesun tarifa, of bay inverti mey biyon florin pa aumenta tarifa di recoge y procesa sushi, anto e scogencia popular di publico ta mas cu obvio.

Noticia relacionaMas for di e autor