E proposito di RAIZ awor aki ta moratorium y integridad den gobernacion. E strategia cu e politiconan kier bin cun’e nan lo atende cun’e tambe na su momento debido.
Den ningun momento Raiz a sinta cu AVP, segun lider di partido Ursell Arends, durante un encuentro cu prensa durante e accion di firma cu a tuma luga riba beach p’azuid di Riu Antillas diadomingo atardi.
Nan no tin ningun motibo pa reuni cu nan, pasobra nan no ta preparando ningun plan di gobernacion of regeerakoord. E unico motibo pakico un partido politico lo sinta cu otro, ta ora cu ta bay negosha un regeerakoord y esaki no ta e caso awor aki, segun lider di Raiz.
No tin ningun motibo pa sinta cu AVP. Pueblo ta sostene Raiz y ta cu pueblo nan ta sinta. Cu pueblo nan ta responde.
Esey ta loke cu Arends a declara na varios ocasion caba. Raiz a declara cu nan punto di bista ta cu si nan tin cu paga un boet pa para e acuerdo ey, pasobra e hotel, una bes cu e bin, ta pa semper.
Un boet bo tin un termino cu por caba di page. Pero un hotel no. Su consecuencianan negativo pa nos bienestar social, tambe ta pa semper.
Tanten cu no tin transparencia, e ora no por papia cu lo hiba Aruba corte cu lo costa nos tanto placa. Ningun hende sa si esey ta e caso y cuanto e lo costa pais Aruba. Si tin transparencia, e prome paso cu ministernan lo tuma, ta pa bay busca e berdad y busca e informacion concreto cuanto e lo costa pais Aruba pa sali for di un acuerdo asina, Arends a comenta.
Arends no sa si e mensahe aki lo yega bon, pero nan punto ta, cu si nan mester paga un boet pa sali for di e acuerdo lo haci’e tambe.
E storia cu e ta GM di un hotel cu a pidi mas camber no ta corecto. Si tin informacion di esey, e minister haci esey publico, cu e a bay pidi e cantidad di camber. Dos politico anticua cu a bin cu strategia di deflecting, Raiz lo atende cu nan na su debido tempo.
Arends a pidi prensa pa no desvia di e punto cu nan ta bezig aki. Si mester desvia di e punto aki, nan mester bin cu prueba.
Tin hopi luga cu a acerca Raiz pa pone e formulario pa firma disponibel. Ta pidi si tin mas compania of instancia cu kier colabora cu Raiz pa haci e documentonan aki disponibel, nan por tuma contacto cu nan via nan website of via nan pagina di Facebook, e ora lo haci esaki disponibel.
Diadomingo mes nan a lanza e formulario aki digital, unda cu por haya esaki riba website y pagina di facebook di Raiz.
Arends ta hopi sigur cu e cantidad di hende cu a sali bin firma, tabata un cantidad grandi.
E peticion ta tuma su curso. Pero ta spera cu den algun siman of algun dia of ora, por yega e cantidad di 10 mil firma, y asina aki pone gobierno y tambe parlamento atende cu e peticion di pueblo, segun Arends.
