Dia 26 di juni 2020 Parlamento a aproba algun cambionan den nos Codigo Penal. Cambionan pa loke ta trata aumento di castigo maximo pa zedendelicten (incluyendo abuso di mucha), tambe nos a trata eliminacion di e verjaringstermijn stipula pa e delitonan aki y nos a autorisa Minister di Husticia encuanto ‘vroegtijdig vrijlating’ di personanan encarcela na KIA, drs. Shailiny Tromp-Lee a declara.
Aumento di castigo maximo
Cu aprobacion di e cambionan a culmina un trayectoria largo cu a tuma lugar den Parlamento, caminda for di 2010 diferente comision y diferente parlamentario a traha riba e concepto di ley cu a keda trata dia 26 di juni 2020. Concretamente por bisa cu 27 artikel den e ley a conoce un aumento den e straf maximo cu por keda duna. Delitonan manera violacion, sex indesea cu un mucha bou di 12 aña, casonan di maltrato premedita cu morto como consecuencia y maltrato severo premedita tur lo subi na 15 aña. Ta trata aumento di 3 pa 6 aña di e castigo maximo valido te na e momento ey. Aki mi ta duna algun ehempel di e aumentonan aproba:
Violacion (art. 2:197 verkrachting) a hisa di 12 pa 15 aña;
Relacion sexual cu un persona menor di edad (art. 2:200) a hisa di 8 pa 12 aña;
Agresion sexual (art. 2:201 aanranding van de eerbaardheid) a hisa di 8 pa 12 aña;
Homicidio (art. 2:259 doodslag) a hisa di 15 pa 24 aña;
Maltrato cu lesion grave a consecuencia (art. 2:273 mishandeling die zwaar lichamelijk letstel ten gevolge heeft) a hisa di 6 pa 9 aña y si a ocaciona morto a hisa di 9 pa 12 aña;
Maltrato severo (art 2:275 zware mishandeling) a hisa di 9 pa 15 aña y cu morto como consecuencia a hisa di 12 pa 20 aña;
Maltrato severo premedita (art. 2:276 zware mishandeling met voorbedachten rade) a hisa di 12 pa 18 aña y si a conduci na morto e castigo a subi di 15 pa 24 aña;
Eliminacion di e verjaringstermijn
Otro cambio cu a tuma lugar ta e verjaringstermijn di diferente delito, esta cu esaki a keda kita pa diferente delito, cual sigur ta haci posibel pa un victima semper por entrega keho, aunke hopi tempo a pasa, toch e abusado por keda investiga y husga. Cu otro palabra e victima no ta perde su derecho pa entrega keho. Esaki sigur ta un cambio cu tabata necesario
Vroegtijdig vrijlating
Vroegtijdig vrijlating tambe a conoce un cambio, esta a duna e Minister di Husticia e posibilidad pa ora cu pa motibo di e problema structural di escasez di cel den KIA e por dicidi ken mag di sali liber mas trempan. Intencion ta pa percura cu personanan cu comete zedendelicten mester sinta ful nan castigo y no mag di keda laga liber prome cu nan castigo pasa.
Parlamento no a introduci castigo maximo, pero a aumenta esakinan. Contrario na e pensamento cu mi ta ripara ta reina den nos sociedad ya ta existi castigo y castigo maximo pa ‘zedendelicten’, esakinan ta forma parti di nos Codigo Penal caba pa hopi tempo. Dia 26 di juni 2020 nos a aproba cambio di un ley existente dus no ta trata introduccion di un ley of articulo nobo. Dia 26 di juni 2020 nos a aumenta esakinan cumpliendo cu e grito di sociedad pa castiga e malhechornan aki severamente.
Con a stipula e aumentonan?
E aumentonan a keda stipula uzando articulo 39 di Statuut cu tabisa cu nos leynan mester ta mas tanto posibel regla na un forma similar y a base di ‘concordantiebeginsel’ por bisa cu awor den Reino e castigonan maximo pa loke ta trata ‘zedendelicten’ ta igual.
Un caso di abuso, ta uno di mas!
Mi kier finalisa e comunicado subrayando cu cualkier tipo di abuso di mucha ta inaceptabel! Cualkier violencia domestico, maltrato y violacion ta uno di mas! Pero mi ta enfatisa cu solamente aumenta e castigo maximonan y eliminacion di e verjaringstermijn no ta suficiente. Mester bin cambio den cada aspecto cardinal den henter e sistema di proteccion di esnan mas vulnerabel, cuminsando den e nucleo familiar. Mas ainda pueblo mester ta consciente cu si di berdad nos kier stop cu tur tipo di abuso y maltrato esaki ta implica: cambio di mentalidad di nos como sociedad y na prome lugar cu cada un di nos mester carga nos responsabilidad.
