Ta sinti cu gobierno ta tambalia y si gobierno cay e pregunta ta si Accion21 ta cla pa bay campaña. Partido Accion21 ta cla pa bay eleccion. Si Gerlien Croes, kende ta parlamentario independiente, lo forma parti di Accion21, ainda no por bisa pa motibo cu el a pidi tempo pa pensa.
Miguel Mansur, lider di Accion21, a indica cu aña pasa na december, desde Eagle LNG, nan a sinta y bisa cu tin chens cu gobierno por cay. P’esey nan mester di un plan di campaña di emergencia di 90 dia. Pueblo ta pidi pa mira e candidatonan, pero e candidatonan no gusta lansa nan mes prome cu eleccion. Esaki ta debi cu ta persigui nan y asina e realidad ta.
E realidad ta cu politica a bira asina sushi pa por haya hende di sector priva bay laga salario halto, pa lastra nan famia y despues ta keda marca politicamente pa resto di bida, ta birando cada bes mas den eleccion. En cuanto campaña, nan ta cla p’e. Mansur a informa cu desde september e lo cuminsa bishita cas un biaha mas.
Candidato riba lista
Den e ultimo lunanan nan ta buscando candidato nobo. Nan tin algun candidato prometedor riba lista. E candidatonan a acepta pero no ta cla pa lansa, ya cu nan ta warda p’e momento yega.
E parlamentario ta spera di por mira movecion di e politiconan existente den e partidonan. Den eleccion anterior tabatin combinacion di dos partido, esta PPA y UPP, pero e no a resulta. Esey ta pone pa pensa cu no tin ningun evidencia den ciclo electoral cu pueblo gusta e combinacion ey. E ta kere den futuro por debati riba esey, pero no tin hopi evidencia cu pueblo gusta e combinacion.
E no ta kere cu Accion21, Marisol Tromp, Gerlien Croes, Ryçond Santos do Nascimento y tur cu ta den oposicion uni y lanta un solo partido nobo. E candidatonan, manera Gerlien Croes y otro candidato ta buscando of dicidiendo pa nan futuro, di cual lider di AVP a papia di track record.
Mansur a indica cu un problema partido nobo ta bay enfrenta na proximo eleccion ta cu nan ta bay tin e efecto di Raiz.
