Sindicato SEPPA ta hayando basta yamada di parti di trahadonan di Serlimar S.G. cu ta hopi rabia y disgusta, cu a informa e sinticado y a manda un memo cu gerencia a saca cu tin e trahadonan preocupa. Tin hopi tension bao di e trahadonan. Ta den un situacion cu por bira algo hopi explosivo na Serlimar. E trahadonan por bay over na tuma accion.
Segun Edmundo Marlin, vice secretario general di e sindicato, desde e situacion cu Serlimar ta aden y cu tin un surseance van betaling na su luga, a kita hala di trahado. E promocion di e trahadonan ta para. Ainda e trahadonan no por haya nan periodiek, pasobra esey tambe ta para.
Pa ki motibo esey a sosode, ta pasobra cu Serlimar te asina leu, no tin placa. E trahadonan no ta mucho contento cu e decisionnan ey, pero ta trahando. Mas ainda, e trahadonan aki hasta ta haciendo mas cu un funcion, pa asina yuda Serlimar. E trahadonan a bin tende algun siman atras cu un miembro di Raad van Bestuur su salario ta bay ta para, pasobra e ta un pensionado. Pa colmo e memo cu a sali e siman aki, ta uno caminda nan ta introduciendo un pensionado pa bin traha y esaki a pone fuse di e trahadonan bula.
E trahadonan no kier acepta esaki, pasobra nan ta bisando con por ta posibel. A kita hala di hende fo’i trabao, nan promocion ta para, nan periodiek ta para, pa motibo di no tin placa y ta bin un memo unda cu ta bisa cu ta tuma un hende cu ta pensionado, cu ta bay reforsa e departamento di P&O. E trahadonan no ta guli e pildo aki. A informa SEPPA cu cualkier momento e situacion por bay fo’i man, den e sentido cu nan ta bay tuma accion si gerencia no hala atras di e decision cu nan a tuma.
