Secretario General di SEPPA Magaly Brito a splica cu e reunion cu tabatin cu gobierno tabata mas bien pa haya claridad riba acuerdo cera cu Hulanda. Nan como sindicato a ricibi copia di e Landenpakket.
E sindicato despues di analisa e documentonan aki a keda cu algun pregunta cu a haya chens pa haci esakinan den e reunion cu tabatin cu Gobierno.
A combersa cu e mandatarionan presente di e preguntanan y a bin tende cu gobierno mes tin mas pregunta y a papia di esaki cu un delegacion cu tabata na Aruba. Gobierno no por a contesta of reacciona riba tur e preocupacionnan di SEPPA. Nan ta spera si cu pronto por tin contesta pa e trahadonan tin poco claridad tambe riba henter e situacion, entre riba oportunidadnan di trabou , cuponan di trabou, etc. Principalmente ta para pa servicio publico cu ta escencial pa cualkier pais y naturalmente mantencion di cuponan di trabou.
SEPPA ta haya cu no por analisa e pandemia basa solamente riba cifranan y e parti economico. Mester wak’e man den man cu e parti social.
E otro tema discuti tabata kico lo bay para finalmente cu e 12.6% cu e empleado publico ta entrega. A informa cu esaki lo keda te proximo aviso, y cu e no ta algo cu por duna nan siguransa riba dje. Pa loke ta futuro di esaki, mester mira con e situacion di pais ta desaroya y sinta na mesa.
SEPPA, el a bisa, desde cu e pandemia a yega Aruba, tabatin diferente atake direccion di e empleado publico. Esaki ta algo cu por contradeci, sintando na mesa. Cada empleado publico su funcion tin su balor pa pais Aruba. Lastimamente aworaki tin hopi rumor coriendo rond, creando incertidumbre bou di ambtenaarnan.
