Awe nochi pa 11:40 pm a atraca un señora cu tabata caminda pa cas. E tabata canando cu su tas di marca Dolce & Gabbana ora diripiente a mira un homber den area di Ranchostraat, na Playa. Djey e mesun persona aki a atrac’e un poco mas panort. El a logra yega un cas situa den Professor Lorentzstraat pa e bati alarma.
Polisnan a yega mesora na e sitio pero a constata cu e atracado a core bay direccion pabou. Den e tas tabatin un cartera color cora. E atracado a logra bay cu 100 dollar y tambe e paspoort cu tabata den e tas. E señora a pasa den un susto.
A notifica e trahado social di Cuerpo Policial pa presenta na e sitio pa por duna un man. Tambe a notifica e departamento investigativo. Unidadnan di polis a cuminsa un buskeda mesora pa mira si por a topa cu e atracado cu e descripcion duna door di e victima. Ultimo tempo e area aki ta bira mas y mas peligroso den oranan di anochi, den cual adictonan ambulante cu ta frecuenta e area pa cumpra y bende droga ta ataca tur esunnan cu ta cana den vecindario, specialmente hende muhenan.
