Loke no a cambia den e 16 dianan cu Aruba conoce Toque De Queda ta e detencionnan cu ta cay net despues cu 9’or bati. Pero loke si a constata cu e cantidad di detencionnan a mengua.
Informacion oficial ricibi for di Cuerpo Policial ta mustra cu den e anochi di diadomingo, 5 di april, pa dialuna mainta 6 di april, a detene seis (6) persona cu a viola e orario di TDQ. Di esakinan, solamente un ta hende muhe, kende a keda deteni banda di Sport Caribe y no kier a duna su nomber.
E otro cinco detencionnan ta hende homber den Cayenastraat; uno banda di Fermin’s Bar den un accidente; uno den Grotebergweg (SN) y dos na Pos Chiquito.
E record di detencion te ainda ta riba e di dos dia di TDQ ora cu a detene 45 persona. Despues por a nota cu dia 30 di maart el a cuminsa baha pa subi bek den weekend, esta diabierna y diasabra, pero ya diadomingo el a baha atrobe na 6 detencion. E dia cu menos detencion tabata 2 di april cu 5 persona deteni.
Toque de Queda ta encera cu ningun hende por ta riba caya ni den cura di bo cas for di 9’or di anochi pa 6’or di mainta. Ta permiti pa bo ta den bo veranda, dilanti bo cas, of bo por ta patras di bo cas, si e no ta grens na un caminda publico. Personanan cu viola TDQ ta core riesgo di haya un boet di 1000 florin y si tin ripiticion e siguiente ta mas halto.
Den dos siman mester paga e boet, si no haci esaki of no ta di acuerdo cu e boet, Ministerio Publico ta mand’e Corte, unda OM normalmente ta pidi un boet mas halto cu e 1000 florin. Den caso cu Corte bay di acuerdo cu e demanda y e persona no por paga e boet, e lo mester bay cera algun dia na KIA.
Aworaki ademas di TDQ, tambe ta na vigor Shelter In Place, locual ta nifica cu luganan escencial so por ta den operacion cu un cantidad minimo di empleado. Y esnan cu ta na cas por sali den casonan necesario so, si no tin cuminda pa bay cumpra esaki, botica, ayudo medico, y haci ehercicio. Tur cos manteniendo reglanan di siguridad.
