Durante e celebracion di Arubadag diadomingo ultimo, Gobierno di Aruba a organisa un asina yama jobfair pa asina demostra e vacaturanan habri na Aruba. Omaira Lares ta directora di Departamento di Recurso Humano (DRH) y tambe tabata presente durante e celebracion di Arubadag.
E tabata t’ey den e seccion di informacion pa atrae profesionalnan Arubiano studiando na Hulanda, cu ta desea pa bolbe na nan isla natal pa sirbi den diferente funcion clave den departamentonan di Gobierno.
Lares a enfatisa cu actualmente tin un escasez di funcion den aparato publico y den hopi departamento tin falta di personal, specialmente den areanan di hurista, ingeniero, maneho, IT, fianza.
Departamentonan di Gobierno ta ofrece varios posibilidad pa “subi e trapi” di e carera, cuminsando for di “junior beleidsmedeker”, despues progresa pa “Senior” y hasta bira un hefe di departamento of director di e departamento. Tin casonan cu un persona por progresa den su carera laboral pa hasta forma parti di Raad van Bestuur.
Lares ta indica cu e salario pa cuminsa den sector publico ta atractivo, pero e “uitloop” no ta atractivo manera sector priva. Aki ta unda actualmente ta haciendo ahustenan pa medio di e conocido Landspakket pa haci e salario mas atractivo cu por atrae e hobennan prospecto pa un temporada di carera laboral di duracion mas largo den sector publico.
Zefráh Habibe ta hurista na Departamento di Progreso Laboral (DPL) cu tambe tabata presente, representando e departamento gubernamental cu ta recluta trahadonan. Habibe a splica cu nan presencia na Arubadag ta pa ofrece informacion na e candidatonan prospecto cu lo desea di bolbe Aruba pa drenta mercado laboral.
Tin hopi vacatura disponibel entre otro den na e parti di hotel, finansa y otro sectornan. DPL ta fungi como un intermediario entre e buscado di trabao y e doño di trabao.
E representante di DPL a indica cu tin interes pa Arubianonan residencia na Hulanda bolbe nan isla natal pa drenta den e mercado laboral.
