Entrante prome di juli 2024, Ministerio di Asuntunan Social y Empleo (SZW) di Hulanda ta aumenta e salario minimo legal na Boneiro, Sint Eustatius y Saba cu respectivamente 11,4 porciento, 12,6 porciento y 5,8 porciento. E salario minimo ta suma e ora ey riba tur tres isla, conforme conseho di e Comision Minimo Social, na un total di 1.750 Dollar Mericano pa luna, pa un siman di trabou di 40 ora. Tambe e sumanan di beneficio social, manera e pensioen di AOV y “bijstand” tambe ta subi!
E salario minimo legal di un trahado di 21 aña of mas ta suma entrante prome di juli 2024, e suma di 10 Dollar Mericano y 10 cen pa ora. E salario minimo ta igual riba tur tres isla, pues mescos na Boneiro, na Saba y na Sint Eustatius. Pa un hoben e salario minimo pa ora ta depende di e edad y ta suma respectivamente $9,09 (20 aña), $8,58 (19 aña), $7,57 (18 aña) y $6,56 (16/17 aña).
E pensioen di behes legal (AOV) ta bira entrante prome di juli 2024, si e ta completamente construi, e suma di 1.488 Dollar Mericano pa luna. E montante di AWW ta depende di edad. Ta aumenta e pago pa viuda di 58 aña y mas tambe na 1.488 Dollar Mericano pa luna. Entrante prome di juli ta aumenta e suma di “bijstand” tambe pa un persona cu ta biba independiente na mas o menos 1.488 Dolar Mericano pa luna; pago di Bijstand ta tuma luga cada kinsena. Si un persona cu ta biba independiente ta completamente incapasita tambe, e ora ey e pago di Bijstand ta suma alrededor di 1.750 Dollar Mericano pa luna. E compensacion pa yui no ta cambia, e ta keda 225 Dollar Mericano pa cada yui pa luna na Boneiro y Saba, pero na Sint Eustatius e ta 216 Dollar Mericano.
Di otro banda, Gobierno di Hulanda ta compensa dunado di trabou parcialmente den e gastonan relaciona cu aumento di e salario minimo pa medio di reduccion di e prima cu dunado di trabou mester paga riba e gastonan salarial bruto cu un total di 3,1 punto procentual. Entrante prome di januari 2024 a reduci e primanan cu dunado di trabou ta paga pa medio di Belastingdienst CN, di 13,4% na 11,9%. Entrante prome di januari 2025 ta sigui reduci e primanan di dunado di trabou na 10,3%. Kico e reduccion di prima aki ta nifica exactamente pa un compania, ta varia pa cada dunado di trabou y ta depende di e cantidad di trahado y haltura di su salario. Ministerio di SZW y BZK ta vigila economia y mercado laboral riba posibel efecto di e subida di e salario minimo y beneficionan social.
Por haya e resumen cu tur e montantenan exacto di e salario minimo legal y beneficionan social pa aña 2024 riba www.rijksdienstcn.com.
Comparacion den Caribe Hulandes
Si analisa Aruba, por ehempel, aki e salario minimo ta na Afl. 1986,20 entrante dia 1 di januari 2024. Na Corsou e salario minimo desde 1 di januari 2024 ta Nafl. 1985.28, pues practicamente igual cu na Aruba. Na Sint Maarten e salario minimo a subi entrante dia 1 di april 2024 na Nafl. 1750 pa luna, pues net $1000,00. Ta obvio cu e islanan BES, cu ta conta cu e leynan social di Hulanda, ta conta cu un salario minimo mas halto, pensioen mas halto, bijstand mas halto y tur otro sosten mas halto cu na Aruba, Corsou y Sint Maarten.
