Riba tur 23 di april ta celebra St. Joris Dag, e ta e patrono di Scouting. Mirando cu 23 di april ta cay den siman, Scouting Aruba a celebr’e riba 20 di april ultimo. Christopher Lake ta altocomisario di Scouting Aruba. Durante un entrevista na Noord, el a conta cu e dia aki ta uno sumamente special p’e movimiento scout. Scouting t’e organisacion hubenil mas grandi mundialmente. Scouting Aruba ta uni nan mes y ta organisa un dia pa conmemora e dia tan special aki c’un ceremonia.
E ta sirbi pa recorda e hobennan riba e promesa di scout y pa contribui n’un miho mundo y asina ta duna un bon sosten n’e comunidad. Importante ta e binimento hunto. E balentia di nos hobennan ta enfrenta problema tur dia pero e forma con pa atende cu nan y yega na solucion ta importante. Scouting ta percura pa crea mas lider den nos comunidad.
Na final di e ceremonia ta haci e parti mas social y spirito scout rond di un kampveer. Tur ta tira un rosa den e kampvuur y haciendo un deseo. E ta un evento nacional, por lo menos rib’e dia di celebracion, a conta cu 250 miembro. Scouting Aruba mes ta conta cu entre 400 cu 450 miembro activo. Nan ta habri pa miembro nobo, cuminsando for di 5 aña caba pero tambe pa lider boluntario for di 18 aña bay ariba.
