Docentenan di Commandeur Pieter Boer Kleuterschool situa na Pos Chikito ta den un tristeza inmenso despues di e noticia di fayecimento di Rishandroh Anastacia. E docentenan a expresa cu scol nunca a pensa cu maltrato por tabata e motibo.
E ta referi na e absentismo largo di e alumno. A purba di tuma contacto cu e mama, pero no a logra. E wela a indica cu su nieto ta dos siman malo y e celular di e mama ta daña y riba dje, el a muda pa un adres desconoci. A haci un cita via e wela cu e mama, pero nunca e mama a presenta.
Scol a tuma contacto via telefon cu Bureau Leerplicht preparando pa un melding por escrito, pero esaki no a bay bon.
“E ta un experiencia hopi tristo pa nos tur como docente. Nos por a salba un bida hoben? E ta haci hopi dolor y nos ta spera cu esaki no ripiti mas”, asina e docente a skirbi riba red social.
“Tur mucha tin derecho riba proteccion di su mayornan y como docente, ta nos deber pa denuncia esaki si esey no pasa. Como scol, nos ta haya cu ta hopi serio cu nos no por a denuncia algo den cuadro di maltrato, mirando cu a opta pa sconde tras di su absentismo, desde principio di e aña escolar nobo. Pues e marcanan di sla of kemadura nunca a yega port’i scol, simplemente e mucha tin lunanan sin presenta na scol mes!
“Tur dia bida ta siña nos algo nobo y como scol, nos a siña awe cu ausencia por nifica salba un bida”.
Cu nos angel chikito y inocente Rishandroh Anastacia sosega na paz.
