Nathalie Maduro ta directora di Santa Rosa. Su conocemento y esfuersonan como directora, a exigi presencia den un grupo grandi den un plan di IDEA. E ta conta cu nan a duna un presentacion ayera pa un grupo di casi 50 productor. Tin di nan ta productornan cu ya tin añanan largo plantando. Tin di nan cu ta prospecto, esta nan tin pensa di cuminsa bay den e industria ey, of den e ofishi eynan. E ta importante pa por sigui organisa e tipo di tayernan aki. Como Santa Rosa tambe, bo ta haya sa di e productor kico ta nan necesidadnan.
Hopi biaha como gobierno of como Santa Rosa, tin varios aña cu ta traha den e mesun sistema. Pero sistema y temporadanan ta cambia. Ta importante pa tin un comunicacion abierto cu nan y ta importante pa e ministernan tambe, esta pa esnan cu ta tuma decision cu sector primario mester di hopi atencion.
A mira cu den e ultimo añanan tabata tin un desaroyo hopi grandi, pero a yega na un nivel cu mester bin cambio. Mester bin cambio den ley, den maneho y fondonan mester wordo poni disponibel.
Pa Santa Rosa mes e ta hopi importante pa por conta cu fondonan pa haci estudio. Tin estudionan cu ta hopi costoso, pero di un otro banda tin hopi studiante awor aki cu ta cabando cu por ta por traha cu nan. Awor aki ta purbando eigenlijk di sigui concientisa. Ta bezig tambe cu cierto proefnan na Santa Rosa, pero tin cu bay cuminsa benchmark. Tin cu cuminsa bay afo, wak kico otro paisnan ta haciendo y vooral den e region mes, pasobra e reto di mas grandi como Aruba, ta nos clima, cu ta hopi extremo. Bo ta tende por ehempel Israel, cu nan ta uza hidroponiconan. Tin tambe awor aki un productor cu a uza un sistema di Israel. El a dur’e algun aña pa e por a adapta. E ta un oportunidad interesante pa Universidadnan di afo, bin Aruba y studia kico e clima ta y con pa bin cu modelonan di produccion cu lo ta uzabel den climanan hopi extremo manera di Aruba.
Interes grandi
Nathalie Maduro a agrega cu tin hopi factor cu ta haci cu hopi hende no ta dicidi pa e bira nan entrada principal, pasobra cu ainda tin hopi limitacion pa e productornan. Como un productor, bo no por bay un banco y haci un fiansa pa por expande. Kico ta pasa. Na momento cu bo no tin e ayudo financiero, hopi biaha bo ta keda pega na un parti pasobra bo tin cu depende di e salario di e otro trabao cu bo tin y atrobe, agricultura, awor aki bo ta mira e scarsedad di awa, tin problema cu una bes cu bin secura, ta bin malesa cun’e.
Kico e ta trece cun’e
Hopi biaha ta rekeri cu e cunukero tin cu cumpra productonan pa combati e problema cu e tin, mientras cu si e tin un ayud financiero, si e tin fondonan cu e por sigui draai, sin tin cu conta riba e fondo chikito ey di su salario, nos por desaroya e sector aki hopi mas.
Obstaculonan
Por mira cu Santa Rosa tabata hopi interactivo cu esnan presente den e presentacion. Tin algun dolor cerca nan y cerca Santa Rosa mes. Maduro a splica ta importante pa nan bin hunto. Di nan banda, nan ta compronde. E meta ta pa haci estudionan pa tin informacion pa duna nan. Pero di nan banda tambe, nan fondonan ta limita. Di nan banda, e gana y motivacion tey. Pero limitacion cu tereno, cu awa, cu fondo. Hopi biaha ta haci cu nan a purb’e por ta algun biaha, pero no a bay bon. Nan a demotiva, pasobra nan ta wak e ora, cuanto placa a wordo hinca aden y no a bay bon. Mientras cu Santa Rosa tin fondonan cu por haci mas estudio, trece experto y tambe hopi importante, motiva nos studiantenan di Aruba pa nan cuminsa bay studia den e direccion aki, a termino largo, Aruba lo tin hopi beneficio, vooral sector primario cu eigenlijk e tarea ta pa Aruba tin un siguridad di cuminda.
