Dokter Agustin Garcia Sanz ta Nefrologo na Instituto Medico San Nicolas IMSAN. Nan ta traha diariamente cu e pashentnan di Dialyse. Durante entrevista el a splica un tiki riba e encuentro cu esnan di Novo Nordisk na Aruba den Renaissance pero tambe el a splica un tiki riba e problema di diabetes na Aruba.
Diabetes ta un problema na nivel mundial y Aruba no ta scapa di dje. Ora nos papia di Diabetes, nos ta papia di un epidemia, mirando cada caso cu ta wordo haya cada aña y como Nefrologo ta mira e problema di riñon, consecuencia di pashentnan cu Diabetes a largo plazo. Aruba tin un gran problema encuanto diabetes. E incidencia ta sumamente halto, cu hopi complicacion, manera problema visual, problema di riñon, problema cardio vascular, problema circulatorio, etc. E ta un problema bastante importante riba e isla.
Mensahe pa hendenan por capta
Garcia Sanz a splica cu lo importante di diabetes ta e prevencion. Tin cu bay dokter pa controla de bes en cuando pa sa si un hende tin of no e enfermedad. Una bes diagnostica evita complicacion. Controla e dieet, controla e peso, haci ehercisio cual ta hopi importante. Controla e stress, pasobra bida ta hopi estresante y ta afecta salud di e persona, specialmente e diabeticonan. E disciplina y educacion di e persona cu diabetes ta fundamental pa sobrevivi. E diagnostico tempran prome cu e complicacionnan ta sumamente importante tambe. Ta un conhunto di factor cu distinto nivel di atencion ta importante. E trabao cu e bus di Ibisa ta haci den diferente bario ta importante. E trabao di e dokter di cas ta sumamente importante. E enfermeranan cu ta traha cu diabetes ta importante y loke no por controla e nivel aki, tin cu bay riba un nivel superior cerca specialistanan, caminda cu por controla si e por tin problema di nier, visual y problemanan cardio vascular. Lo ideal ta pa trata di evita e progresion di e daño cu diabetes tin riba distinto organonan.
Un riesgo grandi
Diabetes ta un riesgo grandi y importante pa mortalidad y morbilidad. Morbilidad ta referi por ehempel cu por haya un stroke y haya un deficiencia cu por nifica un discapacidad den futuro, un trastorno den e calidad di bida di e persona, manera trastornonan visual. Bo por muri pa motibo di diabetes. Ta importante pa controla e sucu den e organismo.
Diabetes no ta descrimina
Durante entrevista cu Dokter Agustin Garcia Sanz a splica cu diabetes no ta descrimina. Den Adulto tin Diabetes tipo dos pero e ta presenta tambe cerca hoben y muchanan. Realmente por mira den tur edad. Pero den mayor cantidad ta mira esaki den adultonan, manera ya menciona.
Control
Regularmente e pashent tin cu bishita su dokter pa e haya su tratamento adecua. Tin varios variante di tratamento. Sea cu ta medicamento, inyeccion di insulina y otro similarnan na insulina. Pero lo mas importante ta pa haci ehercicio, tene un dieet y tuma conciencia y cuida. Cu tin un condicion cu no ta cura, pero cu por controla.
Afecto
Entre un 30 pa 40% di e personanan cu diabetes, por desaroya insuficiencia renal. Un porcentahe di e pashentnan aki por caba den Dialysis, di tal manera cu mas tempran ataca e problema aki, ta mehora e resultadonan y evita e consecuencianan aki a largo plazo cu nos por haya.
Suficiente stoel
E capacidad di Imsan di tratamento di Dialysis ta saturando. Ta hopi cerca di e drempel. Tin otro modalidad di Dialysis cu ta e Dialysis peritonial cu por wordo haci na cas, pero no ta tur pashent ta cualifica. E capacidad pa por atende e gran cantidad di pashent ta disminuyendo.
Trahando duro
Segun e dokter, te cu diasabra siman pasa a traha cu pashentnan di St. Maarten y pa diadomingo nan a cuminsa bay bek. Ya nan a cuminsa retoma nan bida y organisa nan cosnan pendiente, pasobra hopi di nan tin daño na nan cas. Pa Imsan, awo ta un descanso pasobra nan tabata traha di dialuna pa diasabra te cu 11’or of 11’or y mey di anochi. Ta un cantidad menor di pashent y awo por dedica mas tempo y menos cansa na e pashentnan regular di nan.
