Normalmente durante e luna di october, semper Santa Rosa ta organisa su festival di cuminda crioyo en conexion cu e dia Internacional di Alimentacion y tambe na final di aña Santa Rosa ta organisa un ultimo mercado di aña, segun Natalie Maduro, directora di Santa Rosa.
E aña aki a dicidi di merge dos evento. Na prome luga pa ta un tiki mas elabora y pa asina por cera e aña en grande y tambe pasobra como un departamento responsabel, ta purbando di nan banda di wak unda por corta gasto.
E evento yama Christmas Bazaar at the South Side, cu lo tuma luga dia 7 di december. Intension ta pa e bira un celebracion caminda comunidad por bin hunto. Cunukero, criado, piscadornan, tur por bin hunto, pa asina cera e aña. E ta un aña cu a cuminsa cu hopi reto na comienso. Falta di awa. Tabata tin hopi cunukero cu a pasa den situacion dificil. Pero unda tin fe, tin bon resultado y a cuminsa haya awasero bek. Ta contento cu e damnan atrobe tin awa. Segun Maduro, ta un bon momento pa bin hunto y asina celebra locual casi sigur pa otro aña lo bay tin hopi sorpresa como Santa Rosa.
Jennifer Gamez, coordinadora di e proyecto Santa Rosa, a comenta cu dia 7 di december lo bay tin e ultimo evento di Santa Rosa. Ta bay tin diferente vendor. Door cu ta un Christmas Bazaar lo bay tin diferente plato navideño, pero tambe crioyo, manera cabrito, calbas, pampuna. Ta bay tin tambe diferente cos dushi y refreshment. Pa loke ta refreshment y hopi otro producto traha na Aruba, bo por hay’e den forma di giftset.
Tambe si bo ta un cunukero of criado, bo por yama Santa Rosa, pa asina bo haya bo spot pa bende bo carni di porco fresco, cabrito, carne, of fruta fresco of berdura fresco.
Christmas Bazaar at South Side
Christmas Bazaar at South Side powered by Santa Rosa. Esey ta e parti hopi esencial cu tin cu enfoca riba dje, segun vocero di Santa Rosa, Randy Maduro.
Santa Rosa ta carga esaki completamente, cual ta custumber di nan mercado den transcurso di aña cu tur hende conoce. E biaha aki nan ta bay na San Nicolas riba plaza Lolita, unda cu lo transforma esaki den un arena yena cu ambiente. Un y tur ta mas cu bon bini pa asina yega diasabra, dia 7 di december, cuminsando for di 6’or di atardi te cu 11’or di anochi, caminda lo tin un arena yena cu ambiente, unda cu lo tin cuminda crioyo, cumindanan pa e temporada di fin di aña aki.
Kisas tambe lo bay tin diferente artesania, cu ta enfoca riba e temporada di fin di aña. E cuminda, e plato crioyo, e plato navideño. Mas cu claro pa cera e anochi ta bay tin ambiente musical. Tambe lo mira algun efecto di luz cu lo bay tin specialmente riba e anochi aki. Lo bay reconoce seis baluarte, cual lo ta conoci riba e dia ey. Ta trata aki di seis persona, tanto criado, piscado y tambe cunukero.
Musica ta den man di Nico Connor, cu lo ta riba su steelpan. Despues ta sigui cu Gaita Autentico pa drenta den e temporada dushi di fin di aña cu yen di ambiente di Gaita y pa finalisa pa pone e cherry riba e bolo, lo bay tin Claudius y Oreo y tambe e toke sigur cu nos hendenan di San Nicolas gusta.
Dia 7 di december, for di 6’or di atardi te cu 11’or di anochi, Aruba henter ta bon bini pa bin Plaza Lolita pa un celeracion magno organisa pa Santa Rosa.
