Mirando e gran controversia y falta di informacion concreto cu a surgi pa cu e retiro for di lista di MEP di sr. Chris Romero, su grupo di campaña y sostenedornan tin e deber di trece claridad riba loke realmente a acontece.
Dialuna ultimo Chris Romero a convoca un reunion general cu su grupo di campañador y sostenedor pa asina tende for di nan e rumbo cu e tin di tuma pa loke ta number riba lista di MEP. E mandato cu Chris Romero a haya tabata cla: Nos kier mira San Nicolas wordo representa den e prome 5 candidatonan riba e lista, pa asina nos ta sigur cu nos lo tin un voz pa representa nos sea den Parlamento of Ministerraad.
Por ta esnan cu no sa con e statuut di MEP ta hinca den otro lo no por compronde e motibo di pidi number 5 pa San Nicolas. Pero realisticamente den Statuut di MEP ta poni cu representacion den Parlamento ta bay segun secuencia di number y no cantidad di voto (a lo menos cu e candidato saca su mes cu 50%+1 di e kiesdeler pa por gana su derecho di bay Parlamento). Y esaki ta algo cu maske otro candidatonan den MEP a boga pa haci cambio den dje y a hasta bay Parlamento cun’e, nunca a wordo cambia den partido MEP mes.
Ora cu Chris Romero a wordo ofreci number 6 e no por a duna un contesta positivo inmediatamente pasobra e mester a consulta cu su grupo, cu na final di dia ta esunnan cu ta vota p’e y sin nan apoyo e no lo por sigui den politica. E deliberacion a tuma su tempo pasobra no tur tabata de acuerdo cu ta baha Chris Romero di 3 pa 6, pero na final a logra yega na un consensus pa acepta e number 6.
Pa nos sorpresa y desapunto grandi, Chris Romero a comunica na nos cu ora el a bay pa acepta e number 6 esaki no tabata disponibel mas y unico caminda cu por a pone San Nicolas su candidato prominente y Minister tabata na number 18. Esaki a cay den hopi mal tera cerca tur e campañadornan y supporters di Chris Romero, pasobra number 18 ta claramente un posicion di desventaha partido MEP pa San Nicolas. E mandato cu Chris Romero a haya inmediatamente tabata ta cla: Nos no ta tuma e humiyacion aki!
Chris Romero ta traha cu y pa su pueblo. Y den e caso aki el a dicidi loke su grupo di campañador y sostenedor a pidi e pa haci. Sincero y humilde manera semper, Chris a bolbe demostra cu e ta pone su propio pensamento y deseo un banda pa pone deseo di su pueblo di San Nicolas na prome lugar. Y pa nos, como su sostenedornan, e no ta cuestion di number chikito of grandi pero e ta bay pa e respet y aprecio cu claramente no tin den MEP mas pa nos representante Yiu di Pariba.
