San Luis Deportivo a bira oficialmente e di cuater organisacion deportivo na Aruba cu lo ricibi un FIFA Arena Mini Turf, como parti di un proyecto di cooperacion entre Gobierno di Aruba, AVB y FIFA pa sigui inverti den e futuro di e generacionnan hoben.
Minister di Deporte, mr. Gerlien Croes, a haci e anuncio durante un encuentro na San Luis Deportivo, den presencia di e miembronan, boluntarionan, directiva, representante di AVB, FIFA y e muchanan di e organisacion. E momento a sirbi pa reconoce e trabou cu San Luis Deportivo ta haci pa su comunidad y, particularmente, pa futbol hubenil y femenino.
Segun Minister Croes, e proyecto FIFA Arena Mini Turf ta forma parti di un inversion mas amplio den infrastructura deportivo na Aruba. E proyecto ta realisa den cooperacion cu Gobierno, AVB y FIFA, cu apoyo financiero di Fundacion Lotto pa Deporte. Ademas di e mini turfs, e cooperacion ta inclui inversion den e veldnan di turf grandi.
Facebook Live
Croes a destaca cu San Luis Deportivo tin un historia largo y cu recientemente e organisacion a sigui fortalece su infrastructura, incluyendo e instalacion di iluminacion LED. E minister a reconoce tambe e esfuerso diario di directiva, e boluntarionan y tur esnan cu ta contribui pa mantene e organisacion activo.
Pa Croes, deporte no mester ta mira solamente como un actividad extra curicular of hobby, sino como un parti importante di e desaroyo di e muchanan y e hobennan. Segun su vision, mediante deporte, nan ta siña disciplina, responsabilidad, participacion y cooperacion, mientras Gobierno ta inverti den e formacion di futuro ciudadano di Aruba.
AVB tambe a pone enfasis riba e historia di San Luis Deportivo y su contribucion na futbol di Aruba. E organisacion a produci varios futbolista y a continua cu su trabou pa futbol femenino y hubenil. AVB a elogia e esfuerso di e directiva y e boluntarionan, destacando specialmente e renacemento di San Luis Deportivo durante e ultimo añanan.
Segun representante di AVB, ora FIFA a informa cu San Luis tabata den consideracion p’e proyecto, e organisacion a bira un di e candidatonan principal pa motibo di e trabou cu ta haci den e categoria hubenil y femenino. Tanto mucha muhe como mucha homber ta participa activamente den e entrenamentonan, haciendo San Luis Deportivo den un punto importante pa desaroyo di talento den Savaneta.
Representante di FIFA a enfatisa cu infrastructura ta e plataforma fundamental pa desaroyo deportivo. E FIFA Arena Mini Turf lo brinda e muchanan un ambiente miho pa hunga y train, mientras deporte por contribui na nan desaroyo personal y social.
FIFA a reconoce tambe e colaboracion entre FIFA, Gobierno di Aruba, Ministerio di Deporte y AVB, indicando cu e tipo di proyecto ta posibel solamente mediante un esfuerso conhunto.
Cu e anuncio di awe, San Luis Deportivo ta agrega su nomber n’e proyecto FIFA Arena Mini Turf, mientras e diferente partnernan ta mira e inversion como un paso mas den e desaroyo di futbol y di e generacionnan binidero di Aruba.
