Cuater hoben atleta di Taekwondo Team Aruba ta representando Aruba den e G1 Tournament, unda nan ta acumulando experiencia importante pa nan desaroyo deportivo y pa prepara nan pa competencianan internacional di mas alto nivel.
Den entrevista cu 24ora.com, Zyon Klaber a splica cu e participacion den e torneo ta parti di un proceso pa desaroya e atletanan, hopi di nan den categoria cadet y otro aña un den categoria junior. E meta ta pa nan sigui crece den nivel y prepara nan desde awor p’e futuro ciclo olimpico.
Segun Klaber, e competencia ta ofreciendo un reto fuerte p’e hobennan atleta, cu mester adapta nan mes na e nivel internacional. Cada dia di e practica ta brinda nan oportunidad pa evalua nan rendimiento, mehora nan tactica y sigui aumenta nan condicion fisico. E preparacion tambe ta inclui alimentacion saludabel y control di peso, sin somete e muchanan na dieet extremo.
E experiencia di e coachnan cu ta acompaña e ekipo ta un otro elemento importante. Segun Klaber, e atletanan ta train den un ambiente cu calidad, cu e meta pa nan por alcansa den futuro resultado y medaya pa Aruba.
Di Ecuador, Maestro Luis Cano Mejia tambe a destaca e importancia di e intercambio deportivo entre Ecuador y Aruba. Segun e, e participacion ta un gran experiencia p’e hobennan atleta di ambos pais y un oportunidad pa comparti tecnica, conocemento y experiencia.
E torneo ta reuni atleta di varios pais, entre nan Merca, Chile, Aruba y Ecuador. Pa Klaber, mas cu e resultado inmediato, e experiencia, confiansa y perseverancia cu e hobennan atleta ta adkiri ta esencial pa nan crecemento y pa futuro exito den e deporte.
