E bon noticianan pa nos hungadonan di seleccion femenino ta continua. Arubaanse Voetbal Bond ta anuncia cu Aissee Gumbs, hungado di Seleccion Nacional Femenino di Aruba, a firma cu FC Groningen Vrouwen na Hulanda, unda e lo sigui su carera futbolistico cu Tweede Divisie.
Gumbs tin experiencia cu diferente clubnan na Europa. Durante su trayectoria el a hunga pa Excelsior Rotterdam na Hulanda, Club Brugge y KAA Gent na Belgica, y Panathinaikos na Grecia. Awor e ta cla pa cuminsa un capitulo nobo cu FC Groningen Vrouwen.
E paso nobo aki tin un significado special pa Gumbs, ya cu Groningen ta su ciudad natal. Firma cu FC Groningen Vrouwen ta duna Gumbs e oportunidad di sigui desaroya su carera den un luga cu e ta considera su cas.
Den su propio palabranan, Gumbs a expresa: “Groningen is my home town. Dus dit voelt als thuiskomen.”
Gumbs ta forma parti di Seleccion Nacional Femenino di Aruba desde 2022. Aunke Groningen ta e luga cu e ta considera su ciudad natal, Gumbs tin un conexion special cu Aruba via di su mama Arubiano y ta sigui representa e isla na nivel internacional.
E paso pa FC Groningen Vrouwen ta un otro logro den e trayectoria futbolistico di Gumbs y ta un momento positivo pa futbol femenino Arubano. Su experiencia na diferente clubnan Europeo y su participacion cu Seleccion Nacional ta contribui na su desaroyo continuo como futbolista.
Arubaanse Voetbal Bond ta desea Aissee Gumbs hopi exito den e capitulo nobo di su carera cu FC Groningen Vrouwen, mientras e ta sigui representa Aruba y futbol femenino Arubano na nivel internacional.
