Diabierna, 17 di maart, un cantidad di pais ta celebra “St. Patrick’s Day”. Aunke cu e celebracion aki no ta di Aruba, dor di influencia di turismo, specialmente e hotelnan a cuminsa celebr’e y pocopoco tur cu yama “Patrick” ta considera e fecha “nan” dia.
Saint Patrick’s Day ta un celebracion cultural y religioso cu ta celebra dia 17 di Maart, fecha tradicional di e morto di Saint Patrick (c. 385 – 461 AD), e santo patrono principal di Irlanda.
St. Patrick’s Day a converti den un fiesta oficial Cristian na principio di siglo XVII y ta observa pa Iglesia Catolico, e Comunion Angelicano (specialmente e Iglesia di Irlanda), e Iglesia Ortodoxo Oriental y e Iglesia Lutherano. E dia ta conmemora St. Patrick’s Day y yegada di Cristianidad na Irlanda y ta celebra e herencia y cultura di e Irlandesnan en general.
E celebracion generalmente ta inclui paradanan publico y bistimento di pañanan berde of shamrocks. Cristiannan cu ta pertenece na denominacionnan liturgico, tambe ta atende servicionan di misa y historicamente e restriccion riba comemento y bebemento di alcohol, loke a fomenta y propaga e tradicion di consumo di alcohol durante e fiestanan.
St. Patrick’s Day, ta un dia festivo na e Republica di Irlanda, Noord Ierland, e provincia Canades di Newfoundland y Labrador (pa empleadonan publico provincial), y e teritorio ultramar Britanico di Montserrat. Tambe celebra en grande na diaspora Irlandes rond mundo, specialmente na Inglatera, Canada, Merca, Brazil, Argentina, Australia y New Zealand.
Ta celebra St. Patrick’s Day den hopi pais mas cu cualkier otro festival nacional. Celebracionnan moderno a wordo influencia grandemente pa esnan di e diaspora Irlandes, particularmente esnan cu a desaroya na Merca. Den e añanan reciente, tabatin critica riba e celebracionnan di St. Patrick’s Day pa a bira demasiado comercialisa y pa fomenta stereotiponan negativo di e Irlandesnan.
St. Patrick’s Day
Patrick tabata un misionero y Obispo Cristian Romano-Britanico di siglo cinco na Irlanda. Gran parti di loke sa di St. Patrick ta bin di e declaracion, skirbi supuestamente pa e propio Patrick. Ta kere cu el a nace na Gran Britania Romano den siglo IV, di un famia Romano-Britanico di placa. Su tata tabata diacono y su welo tabata sacerdote den e Iglesia Cristian. Segun e Declaracion, na edad di 16 aña el a wordo secuestra pa asaltantenan Irlandes y tuma como esclavo di Irlanda Gaelico. Ta bisa cu el a pasa seis aña trahando como un cuidado di carne y cu durante e tempo ey “el a topa Dios”. E declaracion ta bisa cu Dios a bisa Patrick pa e huy bay costa, unda cu lo tabatin un barco wardando pa hib’e cas. Despues di a haya su caminda pa cas, a converti Patrick den un sacerdote. Segun e tradicion, Patrick a bay bek Irlanda pa coverti e Irlandes pagano na cristianismo. E declaracion ta bisa cu el a pasa hopi aña evangelisando den e mita nort di Irlanda y a converti “miles” den e religion.
E esfuersonan di Patrick contra di e druidanan a converti den expulsion di e “colebranan” for di Irlanda (Irlanda nunca tabatin colebra). E tradicion a sostene cu el a muri dia 17 di Maart y ta dera na Downpatrick. Durante e siglonan siguiente, hopi leyenda a crece rond di Patrick y el a converti den e santo mas importante di Irlanda.
Celebracion y tradicion
E celebracionnan generalmente ta inclui desfile y festivalnan publico, sesionnan di musica tradicional Irlandes (ceilithe) y e uzo di pañanan berde of shamrock. Tambe tin reunionnan formal manera bankete y baile, aunke esakinan tabata mas comun den pasado. E desfilenan di St. Patrick’s Day a cuminsa na Merca den siglo XVIII pero no a extende pa Irlanda te cu siglo XX.
E participantenan generalmente ta inclui bandanan di musica, militar, bombero, organisacionnan cultural, asociacionnan boluntario, gruponan hubenil, fraternidadnan y asina por sigui. Sinembargo cu tempo, hopi di e desfilenan a bira mas parecido na un carnaval. Ta haci un mayor esfuerso pa uza e idioma Irlandes specialmente na Irlanda, unda cu e siman di St. Patrick’s Day ta e “siman di e idioma Irlandes.”
Cristiannan tambe ta asisti na servicionan religioso y ta elimina e restriccion riba comemento y bebemento di alcohol pa e dia. Kisas debi na esaki, e consumo di alcohol, specialmente whisky, cerbes of e sidra Irlandes, a converti den un parti integral di e celebracionnan. E custumber di e dia di St. Patrick’s Day di “drowning the shamrock” of “wetting the shamrock”, tabata historicamente popular, specialmente na Irlanda. Na final di e celebracionnan, un shamrock ta wordo poni den un kopi, cu despues ta yen’e cu whisky, cerbes of sidra. Despues ta bebe como un brindis pa
St. Patrick’s, pa Irlanda of pa esunnan presente. Ta guli e shamrock cu e bebida of saca y benta riba schouder pa “bon suerte”.
Critica riba e celebracion
E Celebracionnan di St. Patrick’s Day a wordo critica, particularmente pa su asociacion cu bebemento publico y conducta indebido. Algun ta discuti cu e festividadnan a bira demasiado comercialisa y pegahoso y a desvia di su proposito original di honra St. Patrick y e herencia Irlandes. E periodista Niail O’Down a critica e intento di replantea St. Patrick’s Day como un celebracion di multiculturalismo na luga di un celebracion e Irlandesnan.
E celebracionnan di St. Patrick’s Day tambe a wordo critica pa fomenta e stereotiponan degradante di Irlanda y di e Irlandesnan. Un ehempel ta e uzo di “trahenan di duende”, cu ta basa riba caricaturanan despectivo di siglo XIX. Den e periodo previo na St. Patrick’s Day 2014, e Orden Antiguo di Hibernistanan a realisa un campaña exitoso pa evita cu e minoristanan Mericano mas popular no bende productonan novedoso cu ta promove e stereotiponan Irlandes negativo.
Algun a describi e celebracionnan di St. Patrick’s Day pafo di Irlanda como exhibicionnan di “Plastic Paddyness”, unda cu stranheronan ta apropia y malrepresenta e cultura Irlandes, reclamando e identidad Irlandes y ta promulga stereotiponan Irlandes.
A prohibi Gruponan di LGBT na Merca pa marcha den e paradanan di St. Patrick’s Day na New York City y Boston, resultando den un decision historico di Corte Supremo di Hurley versus e Grupo Irlandes-Mericano di gays, lesbiana y bisexual di Boston. Na New York City, a lanta e prohibicion na 2014, pero gruponan di LGBT ainda ta haya cu bareranan na participacion ta existi. Na Boston, a lanta e prohibicion riba participacion di gruponan di LGBT na aña 2015.
