Presidente di Sindicato SADA tambe tabata presente na e reunion extraordinario di SIMAR diabierna mainta cu su miembronan, mescos cu siman pasa. Edward Maduro presidente di e sindicato, a comenta cu nan ta den un bloke sindical pa loke ta e ambtenaarnan den gobierno. Logicamente e ora nan ta acudi pa sostene nan coleganan di Simar p’asina mustra, cu apesar cu Simar a yama su reunion riba su mes, pa asina haya mandato for di su miembronan riba kico ta bay ta e siguiente paso, nan a acudi.
Maduro ta splica cu un directiva t’ey pa reuni y duna conseho na e miembronan, pero na fin di dia ta e miembronan ta tuma decision. Ningun directiva di e sindicato por tuma un decision riba su mes sin consulta cu su miembronan. Esey a bin ta sosode den e ultimo dianan cu sindicatonan tin cu yama reunion cu nan miembronan.
“Por a ripara cu e reunion aki tabata tin asistencia masal. Pa varios luna largo a purba di evita tur esaki. For di april a sinta cu gobierno, pero lamentablemente di nan banda, nan no ta duna nada concreto. SADA a bin cu algun proposicion, algun idea con a atende e indexering den pasado pa diferente gobierno. Pero ta parce cu e gobierno aki ta sinta den un stoel di zoya humando un pipa y laga e sindicatonan mustra y haci comosifuera cu nan ta haciendo moeilijk,”
SADA ta kere cu responsablemente mester tuma un decision y bisa con cos ta. Gobierno no ta bisa ni si ni no. Cada rato ta tende cu mester di tempo y espacio. “Si bo no ta duna nada concreto kico ta bo plan pa loke ta trata e 3.6 di 2018, e sindicatonan ta keda den un incertidumbre. Esey ta locual cu no por duna e miembronan. E miembronan ta keda puntra pa clarificacion y esey ta e unico cos cu sindicatonan ta pidi gobierno. Ta yega un momento pa tuma un paso y asumi e parti eynan.”
Maduro ta splica cu e situacion actual ta diferente cu na 2008, manera ta scucha cada rato, manera cu e indexering no ta un derecho etc. Te hasta ta insinua cu sindicatonan a yega di perde caso den pasado, pero awo e situacion ta diferente. E ta diferente pasobra tin un acuerdo bilateral firma na 2014. Esey ta cambia full e panorama compara cu na 2008 cu aworaki tin algo cu gobierno mes a bisa cu e lo bay cumpli cu indexering desde 1 di januari 2019. Eynan ta mira cu e situacion ta diferente. E sindicatonan ta compronde pa gobierno pa e situacion en general, pero gobierno mester asumi su responsabilidad tambe.
