Tur sindicato cu tin miembronan den sector gubernamental a bini hunto diabierna mainta despues di e reunion di SIMAR riba Indexering, despues cu finalmente a haya un reaccion di Gobierno. E sindicatonan cada un riba nan mes a bin ta tumando accion, reuniendo cu nan miembronan y a yega na e punto cu mester a cuminsa escala esaki.
Esey tabata motibo di un reunion yama door di SIMAR pa diabierna mainta cu docentenan. Un reunion unda cu casi 500 persona a acudi. Esaki probablemente a habri wowo di Gobierno cu sindicatonan no ta bay haci wega cu e tema di indexering.
Edward Maduro, presidente di SADA y vocero di tur e sindicatonan, a hiba palabra. El a splica tur e reunionnan cu tabatin cu miembronan pa splica nan riba e tema di indexering, cu nan tin 8 luna caba tratando di atende esaki cu Gobierno. Pero awo mester a informa miembronan cu no ta haya ni oido ni respet di Gobierno. Ta papia di un indexering di 3.6% pa loke ta 2018.
Awe mainta 9’or a haya un invitacion di Gobierno pa un reunion cu Conseho di Minister durante cual lo duna e proposicion di parti di Gobierno. Maduro a bisa cu e situacion no mester a yega asina leu. Awo cu a cuminsa pone presion, Gobierno a core yama un reunion cu e sindicatonan cu tin representacion den sector gubernamental. El a recorda e protocol di 2014 cu ta menciona cu ta bay mira e costo di bida di 2018 pa mira si mester haci ahuste y si esey ta e caso, e lo mester sosode entrante prome di januari, 2019. Pues e ta un derecho cu tur trahado tin pa acerca su doño di trabou pa busca un ahuste debi na aumento di inflacion. Den Gobierno esaki a keda ancra den e protocol di 2014 y e ta poni bon cla eyden. E ta algo cu Gobierno tabata consciente di dje.
Pa awor ta pidi nan miembronan pa keda pendiente pasobra ta bay tuma un pauze chikito y en espera di e resultado di e reunion di diabierna otro siman. “Nos a haci nos maximo esfuerso pa yega na un solucion prome cu a yega asina leu,” Maduro a bisa.
Pues e reunion lo tuma luga riba diabierna, 25 di october. E carta ta mustra cu aparentemente Gobierno awo si tin un proposicion despues di 8 luna. “Pero nos no por duna Gobierno ocho luna mas,” Maduro a enfatisa.
