Rusia ta e prome pais pa completa test di vacuna di Coronavirus

2542

Esaki ta un gran avance p’e vacuna di Coronavirus, Rusia ta e prome pais cu a completa e test clinico di vacuna pa Covid-19 riba ser humano. E resultado ta mustra efectividad di e remedi. E total casonan di Coronavirus mundialmente ta mas cu 13 miyon y e cantidad di morto a surpasa 570.000.

E paso di e pandemia aki ta creciendo lihe, companianan farmaceutico y scientifico ta trahando oranan extra bou presion pa logra keda cla cu e vacuna. Aworaki tin mas di 100 vacuna traha den diferente etapa di desaroyo mundialmente na India, Inglatera, China, Merca, Rusia y Israel. Segun World Health Organization (WHO), ta haciendo test di mas o menos 21 vacuna.

Vacunanan experimental di Covid-19 cu ta den e fase 3 ta Sinovac Biotech di China, China National Pharmaceutical Group y AstraZeneca. Moderna, AstraZeneca, BioNTech, Novavacx, Sinovac, CanSino y Inovio Farmaceutico ta algun di nan cu ta lidera e careda.

Rusia ta prome pais cu a finalisa e test riba ser humano, unda cu e testnan haci riba boluntarionan na Sechenov First Moscow State Medical University a termina completamente exitoso. A laga e prome grupo bay siman pasa diaranson y dia 20 juli e di dos grupo lo bay.

CanSino Biologics di China ta den combersacion cu Rusia, Brazil, Chile y Saudi Arabia pa lansa fase 3 di e experimento di vacuna Covid-19. E exito di China den reduccion di infeccionnan di Covid-19 a haci bida dificil pa test e vacuna den gran escala y te awo poco pais a bay di acuerdo pa traha cu nan. India a duna OK pa haci uzo di Itolizumab pa pashentnan di Covid-19. E remedi aki ta pa cura psoriasis, pero ta laga uza esaki pa pashentnan cu tin hopi problema pa hala rosea.

Ta haciendo estudio si e vacuna di tuberculosis lo yuda reduci morto di Covid-19. Novavax ta hayando 1.6 biyon di dollar como fondo for di Merca pa cubri e testnan y potencialmente trahamento di vacuna p’e virus nobo aki. Inglatera ta casi cera un acuerdo p’e vacuna di Sanofi/GSK pa 624 miyon di dollar y GlaxoSmithKline pa 60 miyon dosis di nan potencial vacuna di Covid-19.