Rudolfo Dirksz di 36 aña di edad tin tres siman caba interna den dr. Horacio E. Oduber Hospital, contagia cu Covid-19. E tabatin dos siman interna den cuido intensivo (ICU) cu retonan fastioso cu halamento di rosea. Aunke e ta contento cu e atencion y cuido cu e ta ricibiendo for di e dunadonan di cuido na hospital, toch el a sigura di no ta desea pa ningun otro hende pasa den un situacion asina.
Despues di mas di un aña di ta cuidando su mes, cera curpa den cas pa no contagia, toch el a pega cu Coronavirus. E ta pensa cu ta na su trabou el a contagia cu ne. Su situacion a cuminsa bay atras y el a bin haya problema serio cu halamento di rosea. Mester agrega cu e hecho di ta obeso no ta yud’e tampoco den e proceso pa surpasa e problemanan cu pulmon.
Na dado momento su dokter a opta pa intern’e den hospital y a dicidi di pone riba mashin den ICU. E no ta un proceso facil, pasobra su pulmonnan tabata faya y e tabata haya 100% di oxigeno artificial pa por a hala rosea. E sensacion cu bo ta depende di un mashin pa hala rosea, ya ta preocupante y ta laga e pashent spanta.
Rudolfo Dirksz a conta cu awor, pocopoco e ta recuperando. Dialuna pasa el a test negativo pa Covid-19, pero awor mester caba di surpasa e retonan cu e virus a trece cu ne p’e. E ta interna den camber regular y ainda ta dependiendo 15% di oxigeno artificial pa por hala rosea. E ta spera cu si e sigui cura, cu dentro di poco lo kita e mashin completo y asina e lo por bay cas atrobe.
Dirksz a admiti cu e enfermedad aki ta dal bo abou y ta spanta bo. E ta laga bo solitario atras, sin cu pa simannan largo e no por a mira su casa, su mama y su rumannan. Specialmente anochi, prome cu pega soño e ta sinti su mes solitario y ta medio bay den panico pensando cu si e lo lanta na bida mañan atrobe. No ta un sensacion cu e ta desea pa ningun otro hende pasa aden. Un hende por biba sin hopi parti di nan curpa, pero ningun por biba sin rosea. Y cu e enfermedad aki, Covid-19, e ta ataca bo pulmon di tal forma cu e ta haci halamento di rosea normal casi imposibel.
