Ayera nochi a haci e ultimo trabounan pa awe mainta, manera a priminti, por a habri e rotonde nobo completamente. Cu esaki Departamento di Obranan Publico (DOW) ta spera di por regula e fluho di trafico miho, na un forma eficiente y mas economico cu luz di trafico. E rotonde tabata riba e lista di varios mas cu lo bin, pa reemplasa tur luz di trafico riba nos isla.
Trabounan di ayera nochi tabata encera marcacion riba caminda, pinta e banchinan y instala ”wowo di pushi” riba caminda, como advertencia pa automobilistanan cu ta acercando un rotonde.
Aunke no tin e costo total ainda, DOW ta calcula cu e rotonde a costa algo menos cu 100.000 florin. Ta maneho di DOW ultimo añanan pa nan mes construi e rotondenan chikito. Nan ta hacie mas lihe y mas barata compara cu sector priva.
DOW ta yama danki na un y tur pa e pasenshi brinda durante e ehecucion di e proyecto aki.
Mientrastanto ainda DOW ta supervisa construccion di e rotonde grandi na Palm Beach, na altura di Wendy’s y McDonald’s. A construi e rotonde den dos fase. E prome ta cla caba y awo ta trahando na e otro banda riba e di dos fase. Asina cu keda cla den e proximo simannan, lo nota un fluho di trafico mas ‘smooth’ den e area turistico di nos pais.
