Minister di Turismo, Dangui Oduber a confirma cu e aeroliña mericano JetBlue Airways a anuncia cu entrante 4 di januari 2023 no lo tin vuelo directo mas entre Aruba y Fort Lauderdale como tambe entre Aruba y Newark. E aeroliña a anuncia cu nan lo stop por lo menos 37 ruta cu destinacion pa Caribe pa aña 2023. Entre e rutanan aki ta menciona tambe Newark y Ft Lauderdale pa Aruba.
Ta importante pa enfatisa cu e decision aki no ta un refleho di e mercado mericano di turismo pa cu Aruba. Al contrario, JetBlue tabatin un crecemento di 3% den aña 2022 compara cu aña 2019, no obstante dificultadnan di e pandemia.
Durante e ultimo lunanan JetBlue a haya nan mes cu hopi contratiempo operacional. Segun e aerolinea, a tuma e decision aki pa asina nan por brinda un miho servicio y calidad na tur pasahero cu e capacidad operacional cu nan tin awor.
Pero tambe mester bisa cu na mes momento JetBlue a anuncia cu nan lo aumenta e vuelonan entre Aruba cu New York y tambe vuelonan entre Aruba cu Boston, pues esaki ta crea un balans den e “capacity gap”. E asientonan di vuelo cu Aruba ta perde di e dos destinacionnan Ft Lauderdale y Newark, ta wordo yena door di vuelonan cu lo aumenta desde New York y Boston. Actualmente tin 25 vuelo entre Aruba cu New York y 15 vuelo entre Aruba cu Boston pa siman.
Minister Dangui Oduber di su banda ta sigura pueblo di Aruba cu e team di Aruba cu ta encarga pa habri rutanan nobo lo sigui traha ariba esaki pa nos por avansa hunto como pais y yega bek na recuperacion completo di nos turismo.
