Aruba Amateur Weightlifting Association (AAWA) ta anuncia cu orguyo enorme cu Aurora “Rory” van Ulft, di apenas 13 aña, a logra un debut internacional historico na e Campeonato Mundial Hubenil di International Weightlifting Federation 2026 na Santiago de Cali, Colombia. Riba e prome dia di competencia, diasabra 5 di juli, Rory a bira Campeon Mundial den su debut na un competencia internacional di IWF.
Tres medaya di oro y dos record mundial
Den e categoria di 44kg dama, Rory a competi contra ocho pesista di paisnan rond mundo, di cual mayoria ta entre 1 cu 4 aña mas bieu cu ne. Den su prome intento den snatch, el a hisa 67kg, sigurando su prome medaya di oro. El a faya su segundo intento, pero den su tercer intento e ta logra 69kg.
Den clean & jerk, e ta logra su prome intento cu 88kg pa sigura medaya di oro den clean & jerk y total. Su segundo intento la hisa 93kg, cual ta pone dos record mundial hubenil simultaneo – den clean & jerk y den total. El a haci un intento pa mehora su record na 95kg den su tercer intento, pero no a logra.
Asina ki, Rory ta bira Campeon Mundial den tur tres disciplina. E ta termina e competencia cu un resultado oficial di:
- Snatch: 69kg
- Clean & Jerk: 93kg (Record Mundial)
- Total: 162kg (Record Mundial)
Na segundo luga a finalisa Asel Senel di Turkia (66-77-143), 19kg tras di Rory. Althea Bacaro di Filipinas a gana brons cu 60-80-140, y Mariana Asprilla di Colombia a yega di den tercer luga den snatch cu 61kg.
“Tabata hopi leuk”
Despues di e competencia historico, Rory a comparti su reaccion cu durante un entrevista: “Tabata hopi leuk – un experiencia nobo pa mi unda cu ma hisa hopi bon. Mi a gusta e ceremonia di medaya tambe. Mi nunca a experencia algo asina antes.”
Un Momento di Orguyo pa Aruba
E ceremonia di medaya tabata un momento extra special: e entrega di e medaya y e peluche di e mascota Cañita tabata haci pa nos propio Nicole Hoevertsz, representando Comite Olimpico Internacional (IOC). Tambe presente pa presencia e logro historico di Rory tabata su famia, kende a biaha di Canada pa acompañ’e den su debut mundial.
Di parti di AAWA, Hugo Themen a fungi como Technical Official di e competencia, mientras Michael Bareño tabat’ey como delegado oficial di Aruba.
Un Caminda Extraordinario
Rory a cuminsa weightlifting na edad di seis aña, originalmente como preparacion pa evita lesion den gimnasia. Na edad di nuebe aña e a bira e persona mas hoben den historia (homber of muhe) cu a hisa dobel su peso corporal den competencia. Desde 2020, Rory ta invicto den tur competencia na nivel local, nacional y regional na Canada, Merca, Aruba y awor tambe na nivel mundial.
Rory por representa Aruba danki cu e tin paspoort Canades y Hulandes. Algun tempo atras, su tata Cavan, cu sosten di AAWA y e Comite Olimpico Arubano (COA), a scoge Aruba como e pais pa e representa internacionalmente y e Mundial Hubenil na Cali como su debut.
Gradicimento
AAWA kier a manda palabra di felicitacion na atleta Rory van Ulft, su coach Spencer Moorman y su famia cu e logro extraordinario aki. AAWA ta gradici tambe na Stichting Sportsubsidie Aruba, Lotto pa Deporte y e Comite Olimpico Arubano, pa nan apoyo grandi na Team Aruba Weightlifting durante e Campeonato Mundial aki.
Proximo Paso: Campeonato Panamericano y Suramericano Hubenil
Despues di e triunfo aki, Rory ta bek na cas y pronto lo cuminsa prepara pa competi den e Campeonato Panamericano Hubenil (sub15 y sub17) combina cu e Sur Americano (sub15, sub17, sub20, senior) na Guayaquil, Ecuador den fin di augustus.
Aruba Amateur Weightlifting Association ta pidi comunidad pa sigui celebra e logronan extraordinario di nos atleta Rory, cu na apenas 13 aña, ya ta poniendo Aruba den historia di deporte di Weightlifting mundial.
