Desde dia 1 di februari 2019, Minister Glenbert Croes a nombra su mesun coordinador, Ronnie Irausquin, den e funcion di Director interino di Departamento pa Progreso Laboral (DPL). Cu e nombracion aki a termina trabou di e Management Team. Awor ta pendiente di aprobacion di Departamento di Siguridad Nacional, como cu e ta un “vertrouwensfunctie” pa asina por finalisa e nombracion oficialmente. Ya caba Conseho di Minister a aproba e nombracion si y Irausquin a asumi e funcion mesora, aunke ta den funcion di Director Interino.
Ronnie Irausquin tin un trayecto largo na Departamento di Labor. Ta un gobierno di asignatura di MEP mes a tum’e na trabou, pero no den gerencia. El a sa di pasa den varios funcion den e añanan cu a sigui y te cu bou di Gobierno di AVP el a alcansa e funcion di hefe di e departamento di “Toelating”.
Pero na cambio di Gobernacion na november 2017, Ronnie Irausquin a bay traha como Coordinador di Minister Glenbert Croes. E mes tabata campañado di Rocco Tjon durante e ultimo eleccion.
Na dado momento, despues cu a yega un acuerdo cu e ex Director di DPL, e ultimo aki a acepta un oferta y a tuma retiro. A habri vacatura y na januari ainda a pidi pa interesadonan solicita prome cu dia 23 di januari 2019. Den un siman di tempo Minister a tuma decision mesora cu di e mas o menos 5 solicitantenan, cu a dicidi di nombra Ronnie Irausquin den e funcion.
Loke ta hala atencion sinembargo den e anuncio di trabou ta cu a exigi pa e solicitantenan ta di nivel Universitario, loke definitivamente e Director nobo no ta. No obstante, ta interogativo di Minister Glenbert Croes pa tuma un Director y obviamente e por desvia for di e condicionnan cu e mes a pone pa por solicita. No por kita for di e realidad si cu e nombracion aki ta duna tur indicacion di ta complacencia politico debi cu un persona hopi cerca di e Minister, sin e educacion y preparacion necesario, ta yega na e puesto maximo di Director di Departamento di Progreso Laboral.
