Dia 12 di april 2024, Association of Dutch Caribbean Economists (ADCE), conoci tambe como “Club di Economista”, a organisa un simposio titula “’ABC islands, too dependent on tourism?”. E evento aki a tuma luga den e auditorio di Banco Central di Corsou y Sint Maarten (CBCS).
E presentacionnan di Aruba, Boneiro y Corsou (ABC) a destaca cu turismo ta y lo keda e sector di mas importante p’e islanan, demostrando tanto similaridad como tambe diferencia. E reunion a habri caminda pa un debate tocante e oportunidadnan y e retonan di urgencia. Un diferencia importante entre e islanan ta e fase di desaroyo turistico. Na Aruba, turismo a expande durante decada di 1990. Boneiro y Corsou a conoce un crecemento den e ultimo añanan.
Situacion na Aruba
Na Aruba, e gran escala di turismo, cu riesgo di overtourism, lo por disminui e balor di su producto unico di turismo. E organisacionnan turistico y gobierno ta consciente di esaki.
Situacion na Boneiro
E aumento espectacular di turismo crucero y cu menos cantidad di estadia na Boneiro ta causando un degradacion ambiental, erosion cultural y e perdida di su caracter di small-scale. Gobierno insular di Boneiro ta aspira p’un desaroyo modera.
Situacion na Corsou
E cantidad di vuelo pa Corsou y e luganan di estadia turistico a aumenta significativamente y ta spera cu e ta sigui aumenta den e siguiente añanan. E infrastructura, capacidad di e beachnan y atraccion turistico y e recursonan humano no ta cana pareu. E plannan riba con gobierno lo atende cu esaki ta parcialmente cla.
Den kico nos ta similar?
Un similaridad positivo entre e islanan ta cu turismo, diferente na e otro sectornan, ta promove un crecemento economico. E similaridadnan negativo ta inclui cu e poblacion local no tin suficiente beneficio for di e crecemento di turismo. Otro punto di preocupacion ta e escasez di man di obra local na e hotelnan y e restaurantnan, locual ta forsa e companianan busca trahado stranhero. Esaki ta alterando e composicion demografico di e islanan. Ademas, e islanan no ta capaz di reenforsa e leynan, ni implementa e plannan di turismo.
Conclusion pa e islanan ABC
E conclusion principal di e simposio ta mas cu djis turismo, sin un expansion proporcional di e instalacionnan, e lo no ta sostenibel socioeconomicamente. Pa un desaroyo di turismo sostenibel, ta crucial pa gobierno duna atencion y inverti den infrastructura, medio ambiente y instalacion comunitario di tal manera cu e poblacion local tambe ta beneficia y no ta exclui.
Nos ta laat caba
Tambe e simposio a destaca un reto importante pa e gobiernonan: Cu implementacion di e plannan di desaroyo ta atrasa. Esaki ta rekeri un accion lihe y un compromiso mas fuerte pa implementa e strategianan proponi. Durante e evento a presenta un gran cantidad di dato cu a brinda e economistanan un contesta na pregunta economico clasico manera: “Cuanto?” y “Compara cu kico?”.
Aruba ta lidera den region
Aruba, aclama como lider den turismo entre e islanan ABC, ta alcansa consistentemente n’e prome luga den varios indicado turistico regional. Central den e exito aki, ta figura Aruba Tourism Authority (ATA)…un organisacion clave dirigi pa Ronella Croes como e “Chief Executive Officer” desde creacion di e organisacion na aña 2011.
Den un presentacion recien den un foro cu a tuma luga na Corsou pero cu a conta cu participacion di tur e islanan den Caribe Hulandes, a invita Ronella Croes p’e splica di e rol di ATA y su relacion cu e socionan manera AHATA y Departamento di Asuntonan Economico di Gobierno di Aruba. E demas islanan kier evalua si, en bes di recrea e wiel, si por copia e formula di Aruba pa haci nan destinacion mes of mas exitoso cu Aruba.
Impulsando turismo sostenibel
Segun Ronella Croes, e obhetivo principal di ATA ta pa impulsa prosperidad a traves di desaroyo turistico mientras ta promove sostenibilidad. Esey ta implica posiciona Aruba como un destino deseabel mientras cu ta fomenta practica sostenibel dentro di e sector turistico.
Conexion entre socionan
Como autoridad den turismo na Aruba, ATA ta sirbi como un conector entre varios socio, incluyendo e entidadnan priva y publico, tanto riba nivel local como internacional. A traves di e colaboracion y e co-creacion di proyecto, ATA ta sigura cu e beneficionan di turismo ta yega na tur e sectornan den comunidad Arubiano.
Innovacion y desaroyo sostenibel
Ora toca e vision di ATA, Ronella Croes ta enfatisa e importancia di innovacion y desaroyo sostenibel. E iniciativanan di ATA ta enfoca riba contribucion economico, proteccion di medio ambiente, experiencia di e bishitante y calidad di bida di e residentenan. Pero, manteniendo un balans delicado den esaki.
Generando beneficio economico
A pesar di e retonan, e sector turistico di Aruba a experencia un crecemento notabel bao di liderazgo di Ronella Croes. E indicadonan clave manera e creditonan turistico, REVpar disponibel y yegada di turistanan a mustra un mehoracion significativo, reflehando e exito y e resiliencia di e industria turistico di Aruba.
Perspectiva historico y evolucion strategico
Reflexionando riba e biahe turistico di Aruba, Ronella Croes ta destaca e cambio strategico di e isla na turismo como motor economico principal. Despues di privatisacion na aña 2011, ATA a evoluciona pa enfoca mas den desaroyo di destino, alineando cu e maneho nacional di turismo di Aruba.
Colaboracion cu e islanan ruman
ATA ta reconoce e importancia di colaboracion cu e islanan ruman, Corsou y Boneiro den e panorama turistico di Caribe. ATA ta sigui ta habri pa comparti experiencia y colabora den iniciativa cu ta beneficia tur e partidonan envolvi.
Perspectiva pa futuro
Mirando padilanti, Ronella Croes ta enfatisa e compromiso di ATA cu e crecemento sostenibel y e desaroyo di producto. Cu un enfoke strategico den atrae bishitante di balor halto y garantisa prosperidad pa tur, ATA ta sigui lidera e industria turistico di Aruba pa un futuro prospero y sostenibel.
Conclusion pa Aruba
Concluyendo, e liderazgo di Ronella Croes como CEO di Aruba Tourism Authority, ta personifica dedicacion pa avansa den turismo sostenibel mientras cu ta fomenta prosperidad economico. Su vision strategico y e iniciativanan di ATA ta sirbi como un faro di inspiracion p’e destinonan turistico rond mundo.
