N’e momentonan aki ATA ta proyecta cu lo por ta cerando 2021 cu un recuperacion di 73% di cantidad di bishitante compara cu 2019. Segun CEO di ATA, Ronella Croes, durante un conferencia di prensa di gobierno diahuebs, a menciona cu e proyeccion aki ta uno optimista cu tabatin p’e aña aki y ta refleho di sigur push adicional cu ta dunando resultado positivo y a bin ta haci esaki.
Mirando e importancia di nos recuperacion economico cu ta depende solamente di turismo, e perdidanan si cu a experencia ultimo dos luna y cu ta sigui impacta te cu resto di aña, tin su peso y ta locual mester purba evita.
Cu perdida Croes ta splica cu door di e impacto di variante Delta na augustus, a perde un total di 15 mil bishitante, compara cu loke a proyecta pa e luna di augustus.
Na september esaki tabata 10 mil bishitante y pa luna di october y november ta proyecta tambe cu lo tin 10 mil bishitante menos di loke inicialmente tabatin proyecta.
Pa luna di december sinembargo, ta proyectando cu lo por ta riba 100% di recuperacion pa loke ta cantidad di bishitante den e luna aki, compara cu december 2019.
Esaki ta nifica tambe cu pa december lo por ta sperando riba 100 mil bishitante.
Pa cobertura mas amplio lesa edicion di TREMPAN mañan.
