Un aspecto serio y sigur di hopi preocupacion di gabinete Wever Croes, y ta cu ta otro logro di e gobierno aki, ta e hecho cu Gobierno ta kita y ta trata di kita derechonan constitucional sagrado di pueblo manera e libertad di exprecion, libertad di reuni, libertad di prensa y derecho riba trato igual.
Tur esakinan ta derechonan cu nos tur cu ta biba aki na Aruba tin regla den nos leinan y no por mishi cu nan sin mas. Gobierno ta kita e derechonan aki structuralmente ora ta trata di hende of organisacion cu ta di un opinion diferente cu gobierno, Parlamentario Robert Candelaria a señala.
“Asina gobierno a persigui Speed Andrade por ehempel den Parlamento, purbando di stroba Speed pa drenta Parlamento. Tambe ta trata na want’e aleha di rueda di prensa di gobierno. Danki Dios pa nos sistema hudicial cu a defende derecho di Speed como periodista, cu awe e por sigui haci su trabou.
Tambe a censura un radio emisora cu ta wordo considera di un otro escogencia politico cu e gobierno, uzando un cayon pa mata un muskita, pasobra aki tambe a mishi cu un derecho legal sagrado pa exprecion liber.
Mas leu e gobierno di coalicion a purba stop partido AVP di reuni y comparti informacion riba maneho di gabinete Wever Croes, den edificio di MFA na Noord, cu por cierto a bay hopi bon cu un asistencia enorme, despues cu AVP tambe mester a acudi cerca hues pa defende su derecho.
Kico tur e cosnan aki ta mustra nos? Kico nos por spera den futuro cercano di e gobierno aki?
Pa cuminsa nos ta mira un gobierno cu no tin vision, un gobierno cu ta actua contra tur hende cu no ta di nan color, un gobierno cu lo bay asina leu pa haci mal uzo di su autoridad pa persigui esunnan cu ta pensa diferente cu nan.
Riba tur e abuso aki ta gabinete Wever Croes a bin cu medida financiero doloroso pa pueblo, mienstras ta aumenta presupuesto na luga di baha esaki cu gasto di personal. Nos no ta mira ningun beneficio di e aumento aki pa pueblo, si no ta pa beneficia algun di nan mes hendenan so.
Pues Aruba tin un gobierno awor cu den poco tempo a logra hopi. A logra crea un dficit financiero y ta sigui purba na culpa AVP pa esaki. Nan a crea e deficit aki ora nan a pone hopi di nan mes hendenan den hopi departamento y den Cocolishi. MEP a perde eleccion den pasado pa motibo di Friends and family, pero ainda nan no a siña nan les. Nan ta bolbe ripiti tur e mesun erornan a costo di pueblo.
Pa pueblo mes e gobierno aki no a logra brinda ningun adelanto y atras so ta sigui hiba e pueblo,” Robert Candelaria a declara.
